الفترة اللي فاتت فيه ناس كتيرة الحمدلله جالها الجرانت، وناس تانية وصلت بالفعل، وناس تالتة منتظرة الخبر السعيد قريبًا إن شاء الله .. بما إن البُعبُع الأكبر عندنا كلنا هو الشغل، فأنا حبيت أدي فكرة عامة عن الحاجات الكاچوال اللي اشتغلتها في الخمس شهور اللي فاتوا من يوم ما وصلت.
التجميعة دي لا مقصود بيها إحباط ولا تخويف ولا negativity، دي مجرد نقل تجربة شخصية – قريبة زمنيًا – فيها بعض تفاصيل ومميزات وعيوب الأنواع دي من الشغل، موجهة للقطاع الأكبر من المهاجرين (وهم الناس اللي هتيجي أو جات بالفعل وناوية تنزل تشتغل أي حاجة)، سواء كان هدفهم من الشغل ده هو مجرد تجنب القعدة في البيت أو عدم توفر رفاهية القعدة في البيت .. اللي شايف إن الكلام عن الكاچوال محبط ممكن يتجاهل الپوست ده.
مش هتفرق لو هدفك النهائي هو إنك تلاقي شغل permanent في مجالك، أو إنك تلاقي أي شغل permanent والسلام كنوع من أنواع الـ stability، ووقتها تقرر هل هتعمل كاريير شيفت أو هترجع تدور تاني على مجالك .. في كلتا الحالتين هيكون فيه نوع من الاستقرار المبدئي/الدائم إن شاء الله، أنا بس هأتكلم عن اللي ممكن تعمله في الفترة الانتقالية لحد ما توصل للهدف ده.
الشغل الكاچوال قد يكون متواصل وقد يكون متقطع، دي حظوظ وأرزاق .. ممكن ييجي نصيبك مع حد/مكان كويس تكمل معاه فترة، وممكن تجيلك رسالة تقولك بكره إنت مش معانا، وأنا قابلت الإتنين وأكتر من مرة، فإنت مُعرض إن ساعات يبقى فيه شغل وساعات لأ، عشان كده خلي كل اختياراتك متاحة وإعمل علاقات واتعرف على الناس، وخلي عندك Plan B و Plan C دايمًا.
أنا اشتغلت في الـ construction .. شيل وحط وعدة وكده، ده ممكن يكون في مكان ثابت زي مصنع أو warehouse، وممكن يبقى كل يوم في مكان زي الناس اللي بتبني حاجات جديدة .. معظم الأماكن بيكون إلزامي فيها وجود الـ PPE أو الـ Personal Protective Equipment لكل اللي شغالين، الخوذة والجزمة السيفتي والـ hi-vis vest والحاجات دي، برضه معظم الأماكن بتكون محتاجة White Card License، ودي رخصة بتتاخد بعد كورس مدته يوم واحد وتكلفته حوالي 110 دولار.
الشغلانة دي دخلها بيكون بين 180 و 200 دولار في اليوم (ممكن يكون فيه أكتر من كده لكن ده اللي شوفته)، وهتكون كويسة إلى حد ما لو قدرت تزبط نفسك مع صاحب الشغل بحيث إنها تكون كل يوم، لكن عيبها طبعًا هو إن المجهود البدني فيها عالي ومتعب، فلو ناوي عليها يبقى إعمل حسابك في ده.
اتعلمت من الشغلانة دي شغل الإيد شوية على قدي، كون إن عمري ما عملته قبل كده ده خلاني أستفيد نوعًا ما .. واتعلمت أسامي معظم الحاجات بالإنجليزي (يمكن أحتاجها قدام محدش يعرف) .. واتعلمت إزاي أحاول على قد ما أقدر أتكلم مع كل حد باللغة بتاعته والطريقة بتاعته (التعامل مع الـ tradies مختلف عن التعامل مع الـ white collars مثلاً) .. واتعلمت إن الشغل عندهم شغل والهلس عندهم هلس، مفيش حد بيتأخر ولا بيتدلع في الشغل، كنت بأنزل من البيت خمسة الصبح عشان نتقابل 6:30 ونبتدي .. حاولت أتعلم شوية من اللهجة بتاعتهم، لكني ما أقدرش أقول إني نجحت، بس على الأقل قدرت أتفاهم معاهم.
اشتغلت في convenience stores .. بيع وشرا وسيستم على الكمبيوتر بتتعلمه، ولو هتشتغل بالليل بيبقى فيه من ضمن الشيفت رص البضاعة الجديدة، وبتشوف الحاجات اللي صلاحيتها انتهت وتركنها.
مفيش فيها مجهود بدني يُذكر، لكن المقابل المادي بتاعها مش أد كده، اللي اتعاملت معاهم بيتكلموا في 12-13 دولار في الساعة، وبعضهم للأسف بيستغل إنك جديد فبيخليك تشتغل ببلاش تحت مسمى "التدريب" لمدة قد تطول أو تقصر، لكن كتير منهم كويسين.
اتعلمت من الشغلانة دي إن الكلام العابر مع الناس في العموم بيخلي الجو ألطف وبيخلي الوقت يعدي، وبالذات لما اللي داخلين يشتروا حاجة يكونوا regulars، ده بيكسر الحاجز بتاع (عايز كذا، اتفضل، شكرًا، سلام) وبيعمل نوع من أنواع الصحوبية الخفيفة معاهم، وده مهم وبالأخص في البداية ليك كمهاجر .. اتعلمت للأسف أنواع السجاير مع إني مبطلها، هي الأساس في أي شغل convenience عند كل اللي اشتغلت معاهم، أكتر من 25 نوع وكل نوع فيه منه بتاع عشر أنواع فرعية، كتبتهم وقسمتهم وحاولت أرتبهم عشان أسهل على نفسي، فاللي ناوي على دي يبقى يهتم بالسجاير.
اشتغلت في الـ flyers distribution .. الناس اللي بتوزع ورق دعاية بتاع أي حاجة في التقاطعات والمحطات .. بتروح لشركة شغالة في الموضوع ده (Oppizi مثلاَ) وتسجل معاهم، وقبل التوزيع بتروح warehouse تاخد الورق والتيشيرت بتاع الحاجة اللي بتوزعها، ويوم التوزيع بتعمل check-in في المكان اللي محددينه لك، وتبتدي.
الأجر هنا نسبي مقابل عدد الورق اللي وزعته .. عادة بيبقوا 600 ورقة مطلوب تخلصهم في الشيفت (3 ساعات)، أجر الشيفت حوالي خمسين دولار، فلو وزعت 300 بس مثلاً بتاخد 25 دولار، وده اللي حصل معايا في يوم مطر وماكانش فيه ناس كتير .. فيه ناس بتاخد 3 شيفتات في اليوم (ماكسيمم) بينهم بريك ساعتين تقريبًا، فممكن الواحد يعمل 150 دولار، وشوفت طلبة كتير بيعملوا الموضوع ده part-time عشان يغطوا مصاريفهم .. كل أسبوع بيبقى مطلوب منك تحدد ahead الشيفتات اللي هتاخدها طول الأسبوع اللي بعده، مش اليوم بيومه.
لو معندكش مشكلة في الوقفة ولا مشكلة في الموضوع نفسه، ممكن تخليها option تلجأ له عند اللزوم، لكن الفكرة إنك ماتقدرش تقول أنا النهارده هأجيب فلوس كذا، لأن ده معتمد على خلصت أد إيه من الورق.
اتعلمت من الشغلانة دي كذا حاجة .. أولهم هي محاولة إقناع الناس بحاجة رد فعلهم المبدئي عليها هو الرفض، أتكلم وأتحرك وأحاول أشوف طرق جديدة، مش أفضل واقف زي الصنم كده ومادد إيدي وخلاص، آه الموضوع مش بينفع مع كل الناس لكن أكيد بيفرق شوية .. اتعلمت حاجة تانية أهم، وهي إن عمري في حياتي ما هأشوف حد بيوزع ورق لأي حاجة وأسيبه وأمشي أو أقول له شكرًا، أنا في يوم من الأيام كنت مكان الناس دي، وعارف إن كل ورقة بتتاخد منهم بتزود في الفلوس اللي هياخدوها، فمش هأقول لهم لأ، إنشالله لو كانوا بيوزعوا تعاليم بوذية ولا دعوة لكازينو ولا إعلان لمكاتب قراية الطالع بتاعة الهندوس ولا حتى لو ورق مكتوب عليه إنتوا كلكوا ولاد كلب .. هم ناس مالهومش أي علاقة باللي بيوزعوه، فهآخدها، ولو اللي فيها ما يلزمنيش هأرميها في أي باسكت، ولو أقدر آخد منه ولا منها أكتر من ورقة هآخدهم.
اشتغلت security بعد ما أخدت الكورس بتاعها وطلّعت الـ license (تكلفته حوالي 600 دولار، وممكن يتاخد مكثف في أسبوعين 12 ساعة في اليوم، أو أربع أسابيع شيفت مسائي، أو ستة ويك إند ورا بعض) .. دي بقى بحرها واسع، وكمية الشغل اللي فيها بتعتمد على مباديء كل واحد، فيه اللي هياخد كورس السيكيوريتي بس ويشتغل static أو patrolling، في مول بقى أو في شركة أو في جراچ أو في مكتب أو أو (ودي فرص الشغل فيها لوحدها قليلة، لكنها ممكن تزيد شوية لو معاك عربية ورخصة قيادة)، وفيه اللي هياخد معاه الكورسين بتوع RSA أو Responsible Service of Alcohol، و RCG أو Responsible Conduct of Gambling (تكلفتهم مع بعض حوالي 200 إلى 220 دولار)، ودول بيفتحوا سكك الشغل في الـ pubs والـ clubs والـ taverns والـ hotels وكل الـ venues اللي فيها خمور بشكل عام.
زي ما قلت دي بترجع لكل واحد بيحسب الموضوع إزاي في دماغه .. فيه اللي هيقول لأ دي مش سكتي، وفيه اللي هيقول أنا لا بأشرب ولا بأبيع ولا بأسقي ولا بأشيل ولا بأجيب.
السيكيوريتي متوسط أجره – كمبتديء – حوالي 23 دولار في الساعة، بتشتغل في الأول في الويك إند بس كام أسبوع كده عشان تتدرب، بعد كده ممكن تبقى full-time معاهم .. بيجيلك توزيع الـ roster بمكان ومعاد الشغل بالـ SMS، وبتعمل confirmation وتروح .. ممكن لو كملت فترة مع شركتك تحاول تزبط معاهم إنك تكون fixed في مكان معين طول الوقت لو قريب منك مثلاً، على حسب علاقاتك بيهم .. ده مش مستحيل، وشوفت ستاف سيكيوريتي ثابتين طول الوقت في ويستفيلد مثلاً.
تفاصيل الشغلانة بتختلف، كل مكان عنده الـ SOPs أو الـ Service Operation Procedures بتاعته، لكن المشترك بينهم إن فيه حاجة اسمها Log Book أو Registry Book بتدون فيه أحداث اليوم/الليلة، سواء كانت الأحداث دي هي الحاجات غير الاعتيادية اللي حصلت أو مجرد الـ check الروتيني اللي بيتعمل كل نص ساعة مثلاً.
لو مش معاك عربية فاعتمادك هيكون على المواصلات العامة، وده هيبقى مشكلة مع الأماكن البعيدة وبالذات في النايت شيفت (كنت ممكن أخلص 3 الفجر وأدخل البيت 6 الصبح) .. هيكون عندك مشكلة تانية لو المواصلات اتعطلت لأي سبب، زي الكام thunderstorm اللي عطلوا قطارات كذا مرة .. طبيعة الشغل ده إنه كان بيحدفني كل ليلة في مكان شكل، مرة Maroubra، مرة Engadine، مرة Erskinville، مرة Sussex، مرة Hornsby، مرة قالي عايزك تروح Wollongong وقولتله كلمة قبيحة، وهكذا (ده طبعًا لو ماعرفتش تزبط نفسك في مكان ثابت).
ماديًا لو خليتها full-time casual هتبقى مش وحشة، لكن الإرهاق الجسدي حاجة لازم تتقال، وهو مختلف عن إرهاق الـ construction لكنه موجود .. متوسط عدد الساعات من 8 إلى 10 في الشيفت، وساعات بيبقى أطول، فيه أوقات كنت بأبتدي في أماكن 10 بالليل وأخلص 1 الظهر تاني يوم .. طول الوقت ده إنت واقف أو بتتحرك على حسب المكان، ليك بريك حمام مثلاً أو كده، وبريك الأكل ده على حسب مدير المكان اللي إنت فيه (إفتكر إن كل ليلة في مكان)، فكنت بأعمل حسابي إني واكل وشارب قهوتي ومزبط الدنيا قبل ما أبتدي .. لو إنت مدخن فالموضوع مش كل ساعة ولا إتنين بريك، وبرضه على حسب مدير المكان، فيه ناس سلسة وفيه ناس رخمة.
اللي اتعلمته من الشغلانة دي إن السيكيوريتي ده عليه مسئولية ضخمة، وحجمها بيختلف على حسب المكان (ساعات كنا بنبقى خمسة في مكان فيه 650 واحد)، واحد طالع عينه وبيشوف في اليوم بني آدمين مالهومش حصر ومطلوب منه يحافظ على المكان واللي موجودين فيه، فالناس اللذيذة اللي بتستخف دمها أو بتستظرف قدام اللي معاهم دول بالبلدي (بيكدروا واحد في أكل عيشه) .. اتعلمت أشكال وأنواع الـ IDs المختلفة بتاعة الناس .. اتعلمت استخدام الووكي-توكي والسماعات واستيعاب مداخل ومخارج المكان لو جديد عليا .. اتعلمت إزاي تتصاحب على الناس من غير ما ياخدوا عليك .. اتعلمت كيفية التعامل مع الناس الـ aggressive والـ agitated بدون عنف لكن بحزم .. اتعلمت وأنا مروح قبل الفجر في الويك إند أتصرف إزاي مع المساطيل اللي مرميين أو بيتجولوا في شوارع Town Hall و Wynyard و Central على حسب حالة الواحد منهم.
اشتغلت في كول سنتر، ودي اللي بأرشحها لأي حد عايز يبتدي شغل كاچوال، لأنها في تقديري أكثرهم نفعًا وأقلهم جهدًا وضررًا .. كنت كتبت تفاصيل عنها قبل كده في التعليق السابق.
اتعلمت من الشغلانة دي حاجات كتير .. أولهم تقدم كبير في استيعاب اللهجات المختلفة هنا، وبالذات لو شغال في جهة بتستقبل مكالمات من أماكن مختلفة، فبيجيلك دكتور الجامعة ويجيلك الـ tradie وتجيلك الست العجوزة اللي من أقاصي شمال كوينزلاند ويجيلك شائق الشاحنات اللي من ويسترن أستراليا ويجيلك المزارع اللي من أرياف أديلايد، وهكذا، مع الوقت ودنك بتبتدي تتعود ثم تفهم الناس دي بتقول إيه .. اتعلمت الـ structure بتاع أرقام الـ driver’s license للولايات كلها (كنت شغال في حاجة تبع الحكومة وكان فيه data validation وكان فيه deadline وكانت أستراليا كلها بتكلمنا) .. اتعلمت إزاي أتحكم في الوقت وأشتغل تحت ضغط بجد (أنا كنت في الـ hype اللي ضربت البلد بتاعة My Health Record، فكان الواحد مننا بيستقبل من 140 إلى 150 مكالمة في اليوم، وفي فترة 3 أسابيع التيم – 15 واحد – أخدوا حوالي 31 ألف مكالمة) .. اتعلمت أتكلم زيهم شوية بحكم التعود، فحرف H مثلاً بقى بيتنطق "هيتش" مش "إتش"، وتواريخ الميلاد مثلاً بدل ما هي بتتقال عادية زي بقية الكوكب (18 يوليو 1954) تحولت بمعجزة إلهية إلى "Eighteenth of the seventh fifty four"، وحاجات من دي كتير .. اتعلمت إنك حتى لو إنت مش من محبي الاندماج مع المجتمع ده غصب عنك هتـ socialize مع الناس اللي معاك في التيم والمكان كله بحكم الشغل، وإلا هتبقى بتحكم على نفسك إنك منبوذ ولوحدك ومش هتكمل وسطهم كتير .. الشغلانة دي مش للي عايز ياخد جنب من الناس، لأن اليوم في الكول سنتر تقيل وهيعملوا أي حاجة عشان يعدي.
وأخيرًا اتعملت من كل الحاجات دي شوية تواضع، وتصحيح لموروثات كتيرة جايين بيها من بلادنا .. مفيش هنا تحقير لأي شغلانة، واللي إنت شايف إنه "إيه ده أنا إزاي أشتغل كده؟" ده هنا له قيمته، وبتعرفها لما بتتزنق في أي حد فيهم.
معنديش حاجة أتكسف منها وأنا بأقول الكلام ده .. صحيح ما أنكرش إن فيه أوقات صعبت عليا نفسي فيها، لكنها بتعدي أولاً وبتتعلم منها ثانيًا وبتساعدك في كسب فلوس ثالثًا وبترحمك من اكتئاب قعدة البيت رابعًا .. فلما تبقى راجل مدير ولا دكتور ولا specialist وتلاقي نفسك شغال صنايعي ولا بتبيع بقالة ولا بتوزع ورق ولا بتلف في جراچ ولا بترد على تليفون، الموضوع ده بيعمل جواك كوكتيل مشاعر كده، حاول ترمي الوحش منهم في الزبالة وخلي الكويس يكمل معاك.
ولسه زيرو ندم على الهجرة الحمدلله.
فيه ناس اشتغلت مع UberEats، أنا ماجربتش بصراحة فمعنديش معلومات عنها، لكن اللي أسمعه إنها مش وحشة لو إديت لها كل وقتك، بس طبعًا شغل أكتر يعني فترات سواقة أطول.
آسف للإطالة، وبالتوفيق للجميع.
و لقيت نفسي نازل الشغل في خلال يومين من التقديم عليه. عملوا حاجة ظريفة جداً. شافوا أقرب شركة متعاقدة معاهم لعنوان سكني و سجلوني في warehouse بعيد عن سكني ٢٥ دقيقة و قالولي ده اقرب مكان لعنوان سكنك. الشغل ٨ ساعات عادي في اليوم لمدة خمسة أيام في الأسبوع زي أي شغل. المرتب بالساعة و القبض كل أسبوع. الساعة ب٢٩ دولار. الأسبوع كان عامل 1160$. و بيخصموا الضرائب ببيكون الصافي 940$. غير أنهم بيدفعوا superannuation بالإضافة لكدة. طبيعة الشغل كانت picker في warehouse و الشغل ده أكنك بتعمل shopping في supermarket كبير اوي. الترولي بيكون قد الترولي الكبير بتاع مطار القاهرة الي بنأجره ب٥٠ جنية و بيملوه كراتين فاضية ومعاك scanner بيقولك تروح انهى Aisle و تشيل انهي item من رف محدد و بكمية محددة. و بتحط كل item في الكارتونة الخاصة بيه. و تقعد تكررر الاوردرات بالشكل ده لغاية يوم عملك ماينتهي. الwarehouse حجمه قد bunning او Costco store، و الترولي الواحد عشان يتملي بياخد حوالي ساعتين. لو مش هتروح الشغل في اي يوم كل الي بيطلبوه منك انك تبلغهم قبلها بساعة و المرونة في الحضور دي طبعاً ميزة كبيرة لو عندك مشوار مهم او انترڤيو مثلاً عايز تحضره. أنا اشتغلت معاهم اسبوعين و بلغتهم اني مش متاح الفترة الجاية دي. قالولي مفيش مشكلة و الدنيا كانت سلسة جداً في التعامل من أول التجربة لأخرها. التجربة دي بالنسبالي كانت مهمة جداً لأنها طمنتني أني لو في أي يوم احتجت لمصدر دخل طاريء لمصاريفي الأسبوعية ففي كارت إضافي في جيبي أستخدمه وقت الحاجة. التجربة أنا شايف انها ممكن تكون مفيدة بالأخص لأي حد جاي سيدني جديد و محتاج فرصة عمل سريعة كمصدر للدخل و الاندماج السريع في مجتمع العمل الاسترالي على مايظبط اموره و يلاقي وظيفة في مجال عمله. تحديات العمل ده انه طبعاً بيتطلب مجهود بدني عالي و كمان يفضل يكون معاك رخصة و عربية لأن بنسبة كبيرة الأماكن دي مفيش مواصلات بتوصلّها. دي تجربتي الشخصية و ممكن حد تاني يكون ليه تجربة مختلفة لذا وجب التنويه 
.
