عاوز أكلمكم عن حاجة هنا إسمها الopportunity class ممكن يكون بعضكم عارفها و البعض التاني لأ بس دورت عليه في البوستات المثبتة ما لقيتوش فقلت أكتب بوست عنه أحاول أغطي فيه الموضوع بالقدر اللي أنا وصلت له و هأعدل فيه كل لما أوصل لحاجة جديدة أو لو حد صحح لي معلومة أنا كاتبها
إيه هو ال opportunity class OC ؟
الclass ده معمول للطلبة المتميزين و الموهوبين في NSW عشان يدخلوا فيه في Year 5 and Year 6 و بيتم التقديم عليه و دخول الإمتحان المؤهل ليه في Year 4 و الموضوع ده بدأ من سنة 1932 في NSW ومكمل لحد النهاردة و هو حاجة مختلفة عن ال selective high schools و مالوش علاقة بيها بس بيدي للطفل إحساس بالتجربة بتاعت ال selective high schoolsوالإدارة اللي ماسكة ال OC و ال selective high schools هي نفس الإدارة إسمها High Performing Students Unit. الإمتحان ده بيقدم عليه حوالي 11000 طالب و بيعدي منهم 1800 بس
إزاي الطفل بيتقبل في ال OC ؟
عن طريق حاجتين مع بعض أول حاجة إمتحان ال OC + تقييم المدرسة للطالب خلال year 4 وساعات year 3 كمان
هل فيه مدارس معينة لل OC ؟
ال OC متاح في مدارس معينة بس و مش موجود في كل المدارس هو بالتحديد متاح في 75 مدرسة في الولاية و فيه مناطق مفيهاش أصلا فساعتها بتقدم للطفل في أقرب مدرسة لمنطقتك (لازم هتلاقي مدرسة على الأقل في حدود من 5 ل 8 كم من بيتك ). لو عاوز تشوف المدارس اللي فيها OC في NSW الخريطة دي فيها كل المدارس اللي فيها OC
http://www.maptive.com/ver3/Opportunity
ايه هي مواعيد التقديم ليه و مواعيد الإمتحان؟
الإمتحان ده هيتفتح التقديم ليه السنة دي أون لاين من يوم 1مايو 2018 ليوم 18 مايو 2018 و الإمتحان نفسه يوم 1 أغسطس 2018 ومسموح لك تغير المدارس اللي انت مختارها لغاية 10 أغسطس 2018 و دي الصفحة اللي فيها التواريخ المهمة
https://education.nsw.gov.au/public-schools/selective-high-schools-and-opportunity-classes/general-information
الإمتحان ده بيختبر إيه بالظبط؟
الإمتحان ده بيكتبه Australian Council for Educational Research (ACER) و هو عبارة عن multiple choice في 3 حاجات
- English
- Mathematics
- General Ability
هل طفلي مؤهل لدخول الإمتحان بتاع الOC ولا الإمتحان صعب عليه؟
الإمتحان بتاع الOC عليه تنافس كبير جدا و معمول للطلبة المتميزين فعلا و مع إن التقديم مفتوح لأي طالب بس قليلين هم اللي بيعدوا (حوالي 15% فقط من المتقدمين) بس لو عاوز تعرف عموما طفلك متميز ولا لأ فيه قدامك سيناريوهين:
- تقييم عام متاح حتى قبل Year 4 أو بعد Year 4 وهو assessment خاص بالأطفال من 6 سنوات لحد 16 سنة و 11 شهر اسمه(WISC-V A&NZ)
Wechsler Intelligence Scale for Children Australia and New Zealand Standardized, fifth edition
تصنيف الأطفال فيه ل 7 مجموعات
أكتر من 130 متميز بغباء :D ودول 2.2% من الأطفال
من 120 - 129 متميز جدا و دول 6.7% من الأطفال
من 110- 119 متوسط مرتفع و دول 16.1% من الأطفال
و من 90 - 110 دول الأطفالا المتوسطين اللي هم 50% من الأطفال
وبعد كدة بييجي الأطفال ألأقل لغاية أقل من 69
الشاهد من الموضوع لو ابنك من أول 3 تصنيفات ففرصته عالية جدا إنه يلحق مكان في ال OC و اللينك ده فيه معلومات مستفيضة أكتر عن طبيعة التقييم بتاع WISC-V
https://www.child-psychologist.com.au/wechsler-intelligence-scale-for-children.html
- السيناريو التاني انك عاوز تقيم طفلك بإمتحان OC قبل ما يدخل ال OC (شغل صينيين من الآخر اللي واخدين الموضوع جد أوي) و ده فيه مراكز عاملة preparation course للموضوع ده و بيبقى فيه mock tests بتختبر الطالب بنفس الطريقة قبل دخوله الإمتحان الفعلي
إيه هي الخطوات للتحضير للإمتحان ده؟
- فيه كتب بتحضر الطفل للإمتحان ده تحديدا و من الكتب المشهورة Excel "Revise In a month " Years 4-5 Opportunity Class & Scholarship tests
- انك تنزل sample tests من الموقع الرسمي بتاع NSW Education
https://education.nsw.gov.au/public-schools/selective-high-schools-and-opportunity-classes/year-5/the-test
و ده فيه نماذج إمتحان شبه اللي هيجيله و فيه شكل ال Answer sheet اللي هو بيجاوب فيها عشان يدخل ما يتفاجأش بحاجة
- فيه بعض الناس بتاخد Preparation courses عشان تبقى عملت أقصى ما في وسعها إنها تحضر الطفل للإمتحان
- فيه بعض المواقع تقدر تشترك فيها و بتتيح لك عدد كبير من الإمتحانات و الأسئلة
إيه هي خطوات التقديم؟
- أول خطوة إنك بتعمل registration بعد أول مايو لما الموقع يفتح باب التسجيل و ساعتها بيتبعت لك password تكمل بيها الapplication بتاع الطفل
(تابع الصفحة دي أول مايو عشان تسجل )
https://education.nsw.gov.au/public-schools/selective-high-schools-and-opportunity-classes/year-5
- لما بتخلص الأبليكيشن بيتبعت لك confirmation email فيه نسخة من الأبليكيشن و unique application number بتاع طفلك
-بعد لما باب التقديم بيتقفل بيومين الPrincipal بيبعت تقييم المدرسة إلى اللجنة المشرفة على الOC
- قبل الإمتحان بأسبوعين بيتبعت لك على البيت وعلى الإيميل"Test Authority Letter" و ده الطفل بيحتاج ياخده معاه يوم الإمتحان
- في شهر سبتمبر اللجنة بتجتمع عشان تقيم الطلبات المتقدمة معتمدة في تقييمها على تقرير المدرسة و الإمتحان
- من نص أكتوبر الparents بيجيلهم offers لطفلهم من المدارس اللي هو كان كاتبها لو كان جايب السكور بتاعها و عنده حرية الإختيار إنه يقبل أو يرفض ال offer ده
- على نص يناير 2019 الأطفال اللي قبلوا OC offer من أي مدرسة بيتبعت لهم "Authority to Attend letter" عشان ياخدوه معاهم أول يوم مدرسة
ملاحظات و نصائح:
* بلاش تعيش إبنك أو بنتك جو الثانوية العامة بتاع مصر و تحسسه إن الموضوع حياة أو موت. لو إجتهد و ذاكر ودخل الإمتحان كافأه لأن أصلا الموضوع ده كله على بعضه إختياري
* فيه ناس هنا أصلا ما بتكملش تعليمها بعد الهاي سكول و بيشتغلوا و هم عندهم 16 سنة و بيكبروا و بيبقوا أصحاب شركات و ممكن جدا يشغلوا واحد عندهم كان في opportunity class :D "الكلام ده شفته بعيني" فال OC مش نهاية العالم
* الكلام ده طبعا في الpublic schools اللي في NSW و ما أعرفش الولايات التانية إيه نظامها و طبعا المدارس الخاصة و الإسلامية برة الموضوع ده أصلا
* ال OC فرصة كويسة إنك ترمي طفلك وسط العيال الدحيحة لو انت عاوزه يدخل selective high school لأن البرنامج ده مدته سنتين في Year 5 و Year 6
* مع إن المدارس selective كويسة و بتبقى نسبة البوظان فيها أقل من المدارس العادية لكن لازالت المدارس الإسلامية للي يقدر يدفع مصاريفها أقرب لثقافتنا و بيئتنا خصوصا و إن الترتيب بتاع المدارس الإسلامية متقدم جدا وسط المدارس اللي هنا
آخر حاجة هو طلب شخصي منكم بالدعاء (بظهر الغيب مش في كومنت :D) لي بالهداية و التوفيق و السداد
