كان في أكثر من بوست بيناقشوا قضية شراء البيوت مؤخرا وحبيت أشارك تجربتي في المجال ومزايا أو مساويء الخيارات المختلفة. كيف رح توفر ثمن البيت مش موضوع النقاش هون. طبعا في الأخر هيك قرار بيعتمد بشكل كبير على إيش بيناسبك كشخص بالإضافة لمقدرتك المالية. وكمان حابب أوضح إنه تجربتي في البحث كانت بسيدني بس مش بكل أستراليا ومع هيك ما أتوقع الإختلاف يكون جوهري.
أولا من ناحية إستثمارية لو حبيت تبيع بالمستقبل اللي بيزيد هو سعر الأرض مش سعر البيت. على العكس سعر البيت بيقل بالتقادم. على سبيل المثال بيت متهالك عمره فوق الخمسين سنه، ثمنه كبيت رح يكون جدا رخيص ولكن الأرض في خلال فترة عمر العقار بتكون زادت لدرجة تعوض التهالك اللي بيحصل في عمر البيت. عشان هيك الزيادة بسعر الشقق بتكون أقل شيء دائما لأنه الزيادة في الأرض بتتوزع على عدد الشقق، في حين إنه الزيادة بسعر الأرض لبيت مستقل بتزيد بسعر عقار واحد فقط.
من الخيارات اللي كانت مطروحة ولو إني كنت ما بحبذه خيار الشقق. كنت بنفس المبلغ اللي رح أصرفة على بيت بعيد بقدر أشتري شقة في مكان حيوي أكثر، خدماتة متوفرة وأقرب على السيتي. طبعا الخيار ما ناسبني لإعتبارات شخصية منها عدم وجود متنفس للعائلة أو Backyard وإني رح أكون معظم الوقت مرهون للجيران. على سبيل المثال بعرف مالك شقة ما قدر يركب مروحة شفط على شباك الحمام لأنه الجيران اعترضوا. غير موضوع الحشرات اللي مش بس بيعتمد على نظافتك في بيتك، لا بيعتمد كمان على نظافة الجيران في بيوتهم.
في كمان خيار التاون هاوس، وأنا شخصيا بعتبرة شقة أرضية بطابقين. نفس الشيء خياراتك مش بإيدك وستراتا هي الي بتنظم كل شيء وبدك موافقتهم قبل ما تعمل أي إشي. ضيف علية إنه المساحات الداخلية صغيرة. ميزتة عن الشقق هو إنه بيجي مع أرض. الخيار اللي كان أفضل منه هو شراء فيلا وهي بيوت مستقلة بمساحة أرض محدودة ولكنها مدارة من ستراتا.
هلا بنيجي على البيوت المستقلة وهون الخيارات بتتنوع ما بين شراء بيت قديم، أو شراء أرض وبناء بيت. في سيدني صعب تتملك بيت ثمنه أقل من ٨٠٠ ألف دولار إلا إذا بتبعد كثير وبتاخذ أرض صغيرة. وبالتالي الجماعة اللي بيتملكوا لأول مره مارح يستفيدوا من إعفاءات الدولة للبيوت اللي ثمنها أقل من ٨٠٠ألف.
شراء بيت مبني وجاهز مش خيار سيء. الأمور اللي بدك تاخذها بعين الإعتبار هي إنه بأستراليا مالك البيت الأصلي مش محتاج يصرح full disclosure عن كل شيء البيت تعرض له زي أمريكا. على سبيل المثال وحسب ما فهمت إذا صار مشكلة بأساسات البيت، المالك ممكن يسكر الشقوق اللي في البيت ويبيعه بدون ما يكون ملزم قانونيا إنه يعلن للمالك الجديد عن هاي المشكلة، أو إذا البيت تأثر بنمل أبيض، الخ من مشاكل الأساسات في البيوت الخشب. هون بيصير إنه المشتري لازم يجيب شركات تقيم الأساسات وتفحص موضوع النمل قبل شراء البيت. بس حتى هاي الشركات مش ملزمة قانونيا لأنهم بيقدموا لك أفضل نصيحة مش أكثر. ميزة شراء البيت مبني هي إنك بتسكن مباشرة وعارف راسك من إجريك وتكلفة المشروع كاملة من أول يوم وايش رح تاخذ. طبعا التعديلات في البيت ممكن إنت تعملها براحتك إذا ما بدك ما تجيب عمال يشتغلوها زي الدهان، شباك بده تصليح، تعديل الحديقة، الخ...
شراء أرض والبناء عليها موضوع ثاني. الرسوم بتكون أقل عموما ولكن لما تحسب إنك رح تضل مستأجر طول فترة البناء وبتدفع في الأرض بتكون التكلفة نفسها تقريبا إلا إذا رح تشتري الأرض كاش. طبعا هاد الخيار بيفتح مرونه كبيرة في البيت لأنك رح تعمله زي ما إنت حابب. ولكن المشكلة هي إنك ما بتقدر تضمن إنه المقاول يوصله زي ما إنت تخيلته. والمشكلة الثانية هي إنه المرونة الكبيرة بتخلي المشروع يكبر بدون ما تحس. من وصلة سلك كهرباء هون للون دهان جديد هناك. في أشياء يمكن ما يشملها البناء زي السور وتزيين الحديقة فهاي تكلفة إضافية بدك تكون حاسب حسابها. طبعا المشروع ممكن يكون من خلال شراء أرض والتعاقد مع مقاول بشكل مستقل أو شراء عرض لأرض مع بيت مبني. المساويء هي إنك ملزم بالمقاول في الحالة الثانية ولكنك بتكون عارف إنه الأرض في إلها بيت. في الحالة الأولى إنت حر بالمقاول فكتكلفة بيكون أرخص لأنه في منافسة بين المقاولين على البناء ولكن لحتى تلاقي مقاول يبنيلك البيت اللي بدك إياه بتحتاج فترة أطول فعلى الأغلب فرق السعر رح تدفع معظمه في الإيجار. عشان هيك ركز تلاقي البيت اللي بدك إياه على قطعة أرض مناسبة. من مزايا بناء البيت الخاص فيك كمان هي إنه المقاولين في العاده بيعطوا ضمان لمدة 5 أو 7 سنين على أساسات البيت.
طبعا ممكن عائلتين يتشاركوا بأرض ويبنوا بيتين يعيشوا فيهم. المشكلة هون هو إنك بتتقيد بنوع الأرض. على سبيل المثال عشان تنبني بيت بكراجين محتاج أرض واجهتها مش أقل من ١٢,٥متر. لو بدك تبني بيتين بدك أرض واجهتها مش أقل من ٢٠متر وأنا ما شفت أراض بواجهه عريضه زي هيك بالمناطق اللي كنت أدور فيها (Hills Shire District). عشان هيك قد تكون مقيد بمكان سكنك إذا كان هاد قرارك.
