سلام عليكم يا جماعة الخير،
قلت انقل معلومة قد تفيد ناس ان شاء الله خاصة بموضوع السحب من السوبر.
المعلومة السائدة ان مش هتعرف تسحب اى فلوس من السوبر قبل الوصول لسن المعاش، وهى معلومة صحيحة، ولكن فيه استثناءات.
من ضمن الاستثناءات دى، انك لو محتاج تعمل اى حاجة طبية، لكن فيه شرطين أساسيين، لو متحققين يبقى انت هتقدر تسحب من السوبر:
الشرط الأول: متكونش حاجة طبية ينفع تتعمل ببلاش تحت الميديكير.
الشرط الثانى: ميكونش عندك تأمين خاص يغطى الحاجة الطبية دى.
طبعا فيه شروط أخرى، بس اللى فوق دول اهم اتنين لأن الباقى غالبا بيكون متحقق
الحاجة الطبية دى ممكن تكون لك او احد أفراد اسرتك (زوج، زوجة، أولاد)
الحاجة الطبية دى ممكن تكون تقويم أسنان، خلع ضرس عقل أو أسنان، عملية فى العيون، الخ...
الخطوات:
١. تطلب من الدكتور اللى متابع معاه تقرير طبى بالحالة، والتقرير يكون عليه تاريخ، اسم المريض وعنوانه وتاريخ ميلاده.
٢. تطلب من الدكتور اللى متابع معاه يملأ الجزء الخاص به فى ملف compassionate release.
٣. تطلب من دكتور تانى، (مش لازم يبقى نفس التخصص، ممكن يكون GP، ولو كان نفس التخصص طبعا يبقى ممتاز)، تقرير طبى بالحالة، والتقرير يكون عليه تاريخ، اسم المريض وعنوانه وتاريخ ميلاده.
٤. تطلب من الدكتور الآخر يملأ الجزء الخاص به فى ملف compassionate release.
٥. تطلب من الدكتور اللى متابع معاه (أو المستشفى لو فيه عملية) عرض سعر بتكاليف الموضوع كاملة.
٦. بتروح لموقع مصلحة الضرائب
ATO website
٧. تضغط على ال ٣ خطوط اللى فوق ع الشمال وتختار
Super (from the drop down list)
٨. تختار Manage
٩. تختار Compassionate release
١٠. تملأ الفورم وترفع الورق (التقارير الطبية و عرض السعر quote)
١١. بيردوا عليك فى خلال اسبوع بالموافقة (أو الرفض وأسبابه، ولو اترفض بيكلموك فى التليفون يشرحوا السبب، يعنى مثلا ممكن يكون التقارير وعرض السعر مش عليهم التاريخ او اسم المريض على كل document او مفيش لوجو عيادة الدكتور على كل ورقة، حاجات كده من بتاعت مدام عفاف الأسترالية)
١٢. بتاخد جواب الموافقة وبتبعته لشركة السوبر بتاعتك (كل شركة بيكون لها طريقة اونلاين بتبعت لها بها الموافقة، سواء فورم اون لاين تملاه فى شركة السوبر بتاعتك او ايميل مثلا، وفى كل الأحوال ال ATO بتبعت لهم برضو من عندهم عشان يتواصلوا معاك)
١٣. بتنزل لك الفلوس فى حسابك (نفس المبلغ اللى متوافق عليه فى ابليكيشن ato )
١٤. بيتخصم المبلغ اللى نزل لك من السوبر وبيتخصم فوقه ضرايب. (يعنى لو العملية الطبية تتكلف ١٠ الاف دولار، فبينزل لك فى حسابك البنكى ١٠ الاف لكن يتخصم من حساب السوبر بتاعك ١٣ الف مثلا)
ده لينك الموضوع ده من الموقع الرسمى وفيه الفورم بتاعت ال
Compassionate release
بالتوفيق ان شاء الله
