السلام عليكم
أسئلة كتيرة عن موضوع حوادث العربيات و مفيش اجابة صريحة.. حبيت أشارك تجربتي الشخصية في الموضوع .. يمكن حد يستفيد منها
من حوالي شهرين عملت حادثة مع عربية تاني و ملابسات الموضوع كالاتي ؛
١- انا معنديش تامين (وقتها)
٢- هو عنده تامين ضد الغير (Third Party)
٣- هو المخطىء ١٠٠٪
٤- هو معندوش رخصة محلية و لا اي إثبات شخصية محلي
٥- معاه رخصة دولية و كارنيه يفيد انه طالب في الجامعة
٦- عنوانه كوينزلاند و انا في سيدني
اللي حصل انى ساعتها اخدت صورة من رخصته و من تأمينه واتفقنا اننا هنبلغ التامين بتاعه و هيتولو تصليح العربية بتاعتي .. عربيته هو المفروض يتولى تصليحها على نفقته الشخصية .. بعدها بيومين رجع في كلامه و قالي خلينا نروح ورشة تصليح مع بعض و لو التكلفة اقل من اللي هدفعه للتامين .. هدفعلك دايركت بعيد عن التامين .. وافقت و روحنا و طلعت التكلفة اكبر من المتوقع .. و رجعنا للحل الأول انه يبلغ التامين .. حصل و بلغ التامين بتاعه .. بعتولي و بعتوله ايميل في فورم أملاها و اكتب فيها تفاصيل الحادث ...
المفروض اللي يتم بعد كده انه هو يدفع التامين بتاعه مبلغ ال (excess fee) و التامين يتواصل معايا و اصلح عربيتي على حساب التامين ... قالي اصبر عليًا كام يوم اجهز المبلغ و ادفع و بعدها أبلغك ... و اذ فجأة الراجل اختفى و مبقاش يرد عليًا و لا على التامين
كلمت التامين اكتر من مرة .. لا حياة لمن تنادي .. كان ردهم الوحيد مش هنقدر نعملك حاجة الا لما الراجل يدفع .. يا اما الدفع يا اما انسا الموضوع .. قلتلهم شكرا و بدأت افكر اصعد الموضوع ازاي و اتصلت بالفير تريدنج
(NSW fair trading)
قالولي كلم AFCA ..
Australian Financial Complaints Authority
كلمتهم و عملت شكوى
و جالي الرد خلال اسبوع من شركة التامين انه كل حاجة تمام و روح صلح عربيتك و وفرولي عربية ايجار بديلة طول مدة التصليح
الدروس المستفادة
Keep fighting
لا تستسلم لأي حد بقولك انسا الموضوع و مش هنقدر نعملك حاجة
#حوادث_عربيات
#تجارب_شخصية
