تعديل يا جماعة بناء على الفيديو الجميل اللى فى التعليقات و التعليقات المفيدة بتاعتكم:
بالنسبة لنظام ATAR:
المعادلة اللى انا كتبتها فى البوست الأصلى بتستخدم فعلا فى حساب ال ATAR score مع الوضع فى الاعتبار الاتى:
درجة كل مادة (كل مادة من ٥٠) بيتعمل لها fine tuning بناء على:
١- درجة الطالب فى امتحانات المدرسة (زى اعمال السنة كده) اللى هم اصلا بيتعمل تضبيط بناء على متوسط درجات طلاب المدرسة دى فى امحانات اعمال السنة و متوسط درجاتهم فى امتحان الوزارة مقارنة بمتوسط درجات الطلاب فى استراليا عموما. (طبعا رانك المدرسة بيفرق فى النقطة دى لان ممكن يتعمل للطلاب اللى فى مدرسة رانكها عالى، يتعمل لدرجاتهم scale up ده غير ان بيتعودوا على امتحانات اصعب من امتحان الوزارة اصلا)
٢- متوسط درجات طلاب استراليا فى المادة دى. (بمعنى ان لو المتوسط اقل من درجة ابنك/بنتك، يبقى ابنك هيتعمل له برضو scale up و العكس صحيح).
٣- متوسط درجات الطلاب فى المواد التانية عموما (بمعنى ان لو متوسط باقى المواد اعلى من مادة معينة، يبقى فعلا امتحان المادة دى جه صعب و بالتالى كل الطلاب يتعمل لهم scale up و العكس صحيح)
بعد ما بتتعمل الخطوات من ١ ل ٣، بيتم التعويض فى المعادلة المذكورة، مع الاخذ فى الإعتبار ان لو طالب واخد اكتر من ٦ مواد، فبيتم اختيار درجات اعلى ٦، و من ثم تطبيق الخطوات و التعويض فى المعادلة.
طب بالنسبة لباقى الانظمة (IG/A level, IB, SAT, others):
بيتم معادلة درجاتهم فى كل كلية على حدى و بالطريقة المناسبة لكل كلية، لتحديد ال ATAR score المكافىء لها (مفيش ضوابط معينة او طريقة ثابتة، و لا يمكن توقع المكافىء او حسابه رياضيا، بمعنى ان ٤٠ من ٤٥ مش بالضرورة تكافىء ٨٨.٨٨ فى نظام ال ATAR)
القبول فى الجامعات:
كل كلية كل سنة بتحدد مجموع ال ATAR المسموح به كحد ادنى للدخول.
باقى الانظمة بيتم معادلة درجتهم و تحديد مكافىء لهم، و يشوفوا محقق الحد الادنى للدخول ام لا.
فيه استثناءات طبقا لكل كلية، زى العروض المبكرة لنبوغ طفل بطريقة ملحوظة فى year 11 مثلا، او اعاقات، او ظروف اجتماعية، او مهاجر جديد له اقل من ٥ سنين فى البلد، او او او.
فيه كليات بتطلب حاجات اضافية غير ال ATAR زى بريزينتيشن او انترفيو او بحث او درجة محددة فى مادة معينة فى year 12 او دراسة مواد معينة فى ال high school او او او
----------------------------------------------------------------------
الجزء ده هو رأيى الخاص و وجهة نظرى التى تحتمل الصواب او الخطأ و غير ملزمة لحد:
١- إختيار المدرسة و النظام التعليمى المناسب شىء مهم جدا، اهم من السكن و المنطقة و مكان الشغل نسبيا، لأنى شخصيا سبب من اسباب هجرتى هو تعليم افضل للاولاد و ملائم لدينهم و ثقافتهم.
٢- من وجهة نظرى لو اولادك طلاب محليين Domestic students و ناويين يكملوا حتى الجامعة، مفيش ضرورة لدخولهم انظمة مخالفة للنظام السائد فى البلد، لان النظام السائد فيه قواعد بتخليه fair الى حد كبير جدا لانه بيستبعد ظروف الامتحان و طبيعة المادة انها تحدد مستقبلك، غير ان باقى الانظمة مالهاش ضوابط ملموسة فى التنسيق و لا اثناء الدراسة كتقييم، ده غير انه بمصاريف اعلى، و الفرق فى ال high school فقط.
ربنا يوفق الجميع لما يحب و يرضى و يجعل فيه خيرا كثيرا.
‐-----------------------------------------------------------------------
يا جماعة الخير، عندى سؤال للمستقبل و يا ريت لو حد عنده تجربة او معلومات أكيدة، يفيدنى:
كنت عايز اسأل على نظام التنسيق للدخول للجامعات هنا
Domestic student to meet the university criteria
اللى انا فهمته ان فيه نظام مشابه للثانوية العامة اسمه ATAR
و اللى انا وصلت له بعد بحث، ان درجات
Year 12
بتتحسب فى NSW طبقا للمعادلة التالية:
Aggregate = English + S1 + S2 + S3 + [10%(S4+S5)] = 0 to 99.95
S1, S2, S3 are the highest score subjects
S4 & S5 are the weakest subjects
و ان ممكن الطالب يدرس اكتر من ٦ مواد لو حابب عشان يزود فرصه ان يعلى ال ATAR بتاعه، بس فى الاخر هيحسبوا اعلى ٦ مواد طبقا للمعادلة السابقة.
و عرفت كمان ان المواد بتتقسم ل
High-Scale subjects
Low-Scale subjects
بمعنى ان مش كل درجة بتحصل عليها فى مادة بتتحط زى ما هى فى المعادلة السابقة، لكن لكل مادة scale بتتحسب عليه
فمثلا ممكن الطالب يجيب ٩٠ درجة فى مادة لكن تتحط فى المعادلة ك ٨٤ مثلا، و مادة تاتية تجيب ٩٠ درجة لكن تتحسب ٧٤ بس فى المعادلة، على حسب المادة دى
High or low scale
و فى الاخر كل جامعة بتحط درجات قبول لكل كلية طبقا لل aggregate ، و فيه كليات بتطلب حاجات اضافية زى انترفيو او بريزينتيشن او بحث او او او
اسئلتى بقى:
١- الكلام اللى انا وصلت له ده صح؟
٢- طب لو حد درس من بره البلد او درس على نظام تانى، بيبقى له كوتا؟ و لا بيتقيم ازاى عشان يتحسب له ال aggregate ؟
٣- عن تجربة او معلومة مؤكدة، هل بيكون مطلوب (زى الثانوية العامة فى مصر) ان ال ٦ مواد دول يتقفلوا عشان المجموع يكون ٩٧% او ٩٩% و الكلام ده؟ و هل سهل نسبيا تحقيق ده لو كان مطلوب بما ان قليل اللى بيخش جامعات اصلا على عكس مصر؟
٤- فيه نظام دروس خصوصية و سنتر تعليمى و كده و ضرورى لزيادة فرص تحصيل الدرجات (زى النظام فى مصر كده) ؟
٥- ايه هى المواد المطروحة للطالب اللى بيختار منهم ٦ (او فعليا بيختار ٥)؟ و ايه scale كل مادة؟ لو فيه جدول لكده او رسم توضيحى، يا ريت.
و جزاكم الله خيرا مقدما
#Education
#highschool
