سلام عليكم جماعة 489
الملف ده للناس المجبوره على الريجونال في كوينزلاند او حابه تقعد في منطقه ريجونال من اخوتنا الاحرار..
بما ان معلومات الريجونال شحيحه, خصوصا في كوينزلاند وكأننا الفرقه الاولى من مهاجري الريجونال هناك.. دي بيانات جمعتها من جهات كتيره مختلفة اعتقد انها ممكن تساعد الناس تختار تستقر فين في البداية.. خصوصا اللي هيستقر بأسرته من الاول و عايز يرسى بسرعة في حته مناسبه عشان يفضى لقصة الشغل.
ده ملف فيه مقارنة عامة بين كل المدن الرئيسية الريجونال في كوينزلاند ومدينة سنشاين كوست تحديدا من حيث متوسط الدخل، معدلات الجريمة، نسب البطالة، تخصصات الشركات و عددها و تعداد موظفيها و نسب المسميات الوظيفية فيها واللي اظن انه هيسهل اختيار المدينة المناسبه للبحث عن العمل بداية لكل شخص حسب مجال شغله.
الملف بردو فيه مقارنه للاحياء الرئيسيه جوه Sunshine Coast زي Beerwah، BliBli, Buderim, Caloundra, Eumundi, Nambour, Sippy Downs و غيرهم من حيث تعداد السكان، متوسط الاعمار، نسب العائلات، نسب المهاجرين، نسب سكن الايجار، معدل الجرائم ضد الاشخاص و عدد الجرائم اجمالا وبيانات تانيه اظن مهمة بنسب متفاوتة لكل شخص او اسرة حسب اهتماماتها.
حبيت اركز على المناطق اللي مش على الساحل مباشرة والمناطق اللي فيها محطات القطار.. اظن مهم للمهندسين اللي زي حالتي يبقى سهل عليهم الحركه بين المدن في رحلة البحث عن عمل او يبقوا قريبين من مواقع المشاريع التحتية اللي غالبا بعيده عن المناطق الساحلية العمرانة.
الملف بردو فيه بروفيل مفصل شوية لكل حي بيوضح مثلا عدد المدارس واساميها وانواعها وتقيمها العام، عدد مراكز التسوق، عدد مراكز بيع التموين واساميها، عدد البنوك، عدد محطات البنزين، عدد المطاعم والكافيهات، عدد الحضانات، عدد المستشفيات و المراكز الصحية الحكومية او اللي في شبكة Bupa, عدد الفنادق، عدد الحدائق والمحميات الطبيعية في كل منطقة مع شيت ملخص الارقام اللي متجمعة دي كلها وبيحسب سكور لكل منطقه اجمالا عشان الصورة الخاصة و العامه لكل منطقة تبقى واضحه.
كل مراجعي اللي جبت منها البيانات مكتوبة في الملف
اعذروني لو في اضافه او معلومه خطأ او ناقصة.. دي محاوله مني لرسم صورة حقيقيه من بعيد قدر المستطاع لعلها تفيد الناس اللي بتدور على المعلومات دى.
2018-12-21 باسم العفيفي
