السلام عليكم جميعاً،
ان شاء الله هتكلم في البوست ده عن موضوع صعب شويه و مش كتير بيتكرر في حياتنا بس مهم جدا ان الواحد يبقي عارفه ألا و هو اجرائات الوفاه و الدفن في استراليا.
هتكلم عن ولايه نيو ساوث ويلز تحديدا من واقع تجربه عمليه حصلت قريب.
أولا لو انت في مدن كبيره ذي سيدني او ميلبورن...تأكد بإذن الله ان حتي لو انت مش مرتب حاجه هتلاقي ملييووون واحد يقف جنبك و يجريلك في تخليص الاجرائات ...فممكن تطمن من الناحيه دي...الجاليه ما شاء الله كلها بلا استثناء فيها اكتر ناس جدعه هتشوفها في حياتك.
اول ما تحصل الوفاه بيبقي عندك كذا حاله...ياإما الوفاه تحصل في البيت.... او تحصل في المستشفي نتيجه مرض.... او تحصل في الشارع او الشغل و في الحاله دي بردو غالبا المتوفي هيروح المستشفي عن طريق الاسعاف . بالنسبه للموت في المستشفي...غالبا كل الاجرائات هتخلص عن طريقهم.
خلونا ناخد الحاله بتاعه ان المتوفي هيموت في بيته...لانها الاصعب من ناحيه الاجرائات...في كل الاحوال اول حاجه لازم تطلع للمتوفي هيا وثيقه اسمها verification of death... و دي اللي ممكن يطلعها nurse بس لازم في الاخر يمضيها دكتور ...من غير الوثيقه دي مؤسسات الدفن متقدرش تشيل المتوفي من بيته علشان تحطه في التلاجه استعدادا للدفن. الوثيقه دي بتثبت ان الشخص ده مات فعلا و انه مش في غيبوبه او خلافه
تاني وثيقه لازم تطلع اسمها Medical certificate of cause of death
و دي مش هتطلع الا من خلال دكتور و من غير الوثيقه دي المؤسسه بتاعه الدفن مش هترضي تدفن ...و دي اهم وثيقه. و دي بتثبت ايه سبب الوفاه.
انا انصح دايماً ان يكون في طبيب عيله...بمعني دكتور GP هو اللي بتتعامله معاه علطول لانه هيبقي عارف حاله افراد العيله الصحيه او تطورات اي امراض...فلما يكتب الشهاده مش هيحتاج معلومات كتير عن تاريخ المتوفي الطبي.
بعد كده في كام وثيقه بيتملوا عن طريق الدكتور برده بس اهم وثيقتين اللي ذكرتهم فوق...من الوثائق الاخري:
- Coronial checklist
- Attending practitioner’s cremation certificate
خلصنا الجزء الاول من الورق...ندخل علي اجرائات الدفن و اسعار المقابر.
اول حاجه لازم تعرفها ان شركات الدفن و الجنائز هيا مؤسسات ربحيه ...و ده مش عيب...فالمتوفي بالنسبه لهم هو customer ...فلو كلمت حد ...هتلاقيه بيقولك احنا هنبعتلك عربيه علشان ننقل المتوفي حالا للتلاجه ...فحاول تبقي تشوف الاسعار الاول قبل ما تتفق مع حد و اسأل كذا مؤسسه. الفتره اللي فاتت لما دورت و سألت عن الاسعار في سيدني...لقيتها كالاتي:
- مقبره فرديه قريبه من سيدني(٣٠ دقيقه) ب ١١،٥٠٠ دولار
- مقبره فرديه بعيده عن سيدني (ساعه و ربع تقريبا) ب ٩٠٠٠ دولار
- لما روحت سالت في مؤسسه تانيه لاقيت عندهم مقبره لعدد ٢ شخص بعيده عن سيدني (ساعه و نص ) ب ٩٠٠٠ دولار تقريبا
المقبره اللي لعدد شخصين ...بتاخد صك تملك لعدد الشخصين ...فالمتوفي ممكن يدفن في واحده و بعدين ممكن اهله يتبرعوا بالتانيه او يخلوها لاحد افراد العيله للمستقبل او حتي يبيعوها.
و لو حد معندوش مقدره للشراء...بصراحه في مؤسسات خيريه وافراد كتير في الجاليه بيعرضوا انهم يتكلفوا بالمصاريف دي.
فخلاصه الموضوع...حاول تسأل كذا مؤسسه قبل ما تاخد القرار...عارف ان الوقت ساعتها لاهل المتوفي بيبقي صعب...بس اهل المتوفي أولي بأي قرش ممكن توفره.
الاسعار دي شامله كل حاجه (غسل و كفن و دفن).
أما بالنسبة للاجرائات الماليه و البنكيه اللي أهل المتوفي المفروض يعملوها علشان ياخدوا الفلوس.
احب اوضح ان الكلام اللي في البوست ده بناء عن تجربه شخصيه فرديه مع احد المتوفين حديثا...فكل شخص ممكن تكون حالته مختلفه عن التاني و في عوامل كتير ممكن تفرق ذي في وصيه ولا لأ ...او حجم الممتلكات اللي عند المتوفي ...و التزاماته و ديونه....فياريت الناس متاخدش المعلومات اللي في البوست ده كقاعده عامه.
أول حاجه لما الشخص بيموت....قانونيا المفروض تبلغ البنك بتاعه....و الشخص اللي بيبلغ ده لازم يكون حد من التلاته دول:
Executer: الشخص المذكور في الوصيه و لازم يبقي معاه نسخه من الوصيه كاثبات
Administrator: الشخص اللي اتعين من المحكمه لاداره اموال المتوفي في حاله عدم وجود وصيه....و لازم يبقي معاه حاجه اسمها letter of administration
Next of Kin: وده بيبقي اقرب حد للمتوفي (زوج..زوجه...أخ ...ابن) و لازم يبقي معاه شهاده الوفاه
طيب ايه اللي بيحصل في الفلوس اللي في حساب المتوفي:
اولا: لو المبلغ الموجود في الحساب مش كبير " تقريبا لا يزيد عن الخمسين الف دولار" .... اهل المتوفي هيقدمه شهاده الوفاه و الوصيه اللي تثبت مين الاكسيكوتر والبنك هيشوف اي ديون علي المتوفي (كريدت كادردز ... قروض .. وخلافه) و يخصمها و يحول الفلوس لمنفذ الوصيه.... لو مفيش وصيه...برده مفيش مشكله لو المبلغ مش كبير...هيدوها لزوجته تلقائيا بعد ما تقدم شهاده الوفاه.
علي ارض الواقع فعليا شهاده الوفاه بتاخد في حدود 3 اسابيع او شهر عشان تطلع ...لو اهل المتوفي محتاجين يصرفوا يعملوا ايه.. لو الزوجه تعرف تدخل علي حساب المتوفي الاونلاين.. ينفع تحول فلوس لحسابها عشان تصرف منه سريعا ( و ده الحل الاسهل ) .... لو ملهاش ...ممكن تروح تطلب من البنك. فانا انصح ان لو المبلغ المتروك من المتوفي قليل (لحد خمسين الف) الزوجه تسحبه كله... و بعدين تمشي في الاجرائات علي مهلها...
ثانيا: لو قيمه المبلغ كبيره....هنا المحكمه لازم تتدخل...و الموضوع بيبقي نوعا ما معقد شويه
-البنك بيجمد الحساب بس مبيقفلوهوش... تودع فيه بس مينفعش تسحب منه.
- لو في اي مصاريف دفن او فواتير علي المتوفي لسه مدفعتش...اهل المتوفي بيجيبوا فواتير بيها و البنك بيصرفها.
- اي فلوس بتدفع اوتوماتك من الحساب بصفه دوريه (فواتير...ايجار...) ممكن تقف و ممكن لا....لازم اهل المتوفي يراجعوا البنك و يقولولهم عاوزين ايه يقف و ايه يكمل.
بالنسبه للاجرائات:
1. اهل المتوفي هيبلغوا البنك علشان يجمد الحساب.
2. اهل المتوفي لو معاهم وصيه ... هيطلبوا يفتحوا executor account
و ده الاكونت اللي هتتحول عليه كل فلوس المتوفي سواء فلوسه الشخصيه...او فلوس تامين ...او فلوس السوبر...و ده اللي بيبقي مسئول عنه الاكسكيوتر اللي في الوصيه ...اول الشخص المتعين من المحكمه في حال عدم وجود وصيه...أول ما بيتفتح... ساعتها بيقفلوا حساب البنك الشخصي للمتوفي نهائيا
عشان تفتح الاكسكيوتر اكونت هتحتاج:
1. الوصيه
2. شهاده الوفاه
3a. Letter of probate (in case you have will)
3b. Letter of administration (in case you don't have will)
مصادر و معلومات اضافيه:
https://www.commbank.com.au/content/dam/commbank-assets/support/docs/ADB487-estate-settlement-support.pdf
https://www.anz.com.au/personal/bank-accounts/your-account/deceased-estates/faqs/
