شوية معلومات عن سيدنى معرفتهاش غير لما جيت ويا ريت اللى عندو اضافه يضيفها فى الكومنتات

-الغريب اعمى ولو كان بصير (مهما كنت لفيت وسافرت قبل كده). اول كام شهر هتحس انك مطلوب منك تعيد حياتك كلها تانى من سكن وعربيه وشغل ورخصه وبنك واجرائات كتير اوى حتى السواقه وطريقة المشي فى الشارع والتعامل والقوانين الكتير اوى. لو ربنا بعتلك حد يقف جنبك زى ما حصل معايا هيوفر عليك كتير اوى اوى

-استراليا بلد فيها كائنات كتير جدا جدا. مش بس حشرات وزواحف لكنها فيها طيور جميله جدا ومخلوقات الواحد عمره ما سمع عنها وانواع كتير لدرجة انك هتشعر ان البشر ضيوف عليهم

-لو انت جاى من مصر مش من الخليج هتتفاجئ ان الدوله ليها دور كبير فى وضع قوانين ومتابعة تنفيذها وونظام ودى حاجات ما اتعودناش عليها

-مفيش هنا بواب ينظفلك عربيتك ولا عامل بنزينه ولا الست اللى بنتظف البيت وهتاخد كيس الزباله وانت نازل عادى جدا وحتى الاعمال اليدويه زى السباكه والجناينيه وخلافه هتتعلمها عشان توفر مبالغ كبيره بتدفع للناس ديه لو استعنت بيهم

-اكتر حاجه هتفتقدها فى مصر السواقه بحريه. هنا كمية قوانين للسواقه غريبه والمخالفه الواحده خراب بيوت واشارات المرور اكتر من العربيات

-كل منطقه فيها مول ومكتبه عامه وحديقه عامه واحيانا شاطئ عام وطبعا كله ببلاش وعلى مستوى محترم جدا

-لو انت من القاهره زيي هتكتشف ان مصر مش القاهره بس وهتلاقى شباب زى الفل من كل حته فى مصر من اسكندريه لأسوان

-هتلاقى دوله جوه الدوله اسمها مناطق العرب واللى من وجهة نظرى افضل حاجه فى سيدنى عشان انا فعلا فيها مطمن على اسرتى. اصدقاء اولادى عرب ومسلمين والناس فى الشوارع محجبات وبيتكلموا عربى والمحلات الحلال فى كل حته وكل ده جوه بلد منظمه ونظيفه وفيها نظام وقانون. انا عشت سنين رافض تماما فكرة الهجره لبلد غير مسلم ولما اتضريت وجيت هنا اتفاجئت جدا جدا. بحس انها عامله كده زى الفاتيكان فى روما

-الشمس هنا حارقه بكل معنى الكلمه فعلا بتلسع حتى لو درجة الحراره ٢٥ بس من رحمة ربنا ان معظم الوقت السحب مغطياها

-الامطار هنا فى الصيف والشتاء وغزيره جدا جدا ورغم كده بعد المطر بربع ساعه الشوارع بتلاقيها مفيهاش نقطة مياه عشان مصارف الامطار اللى فى كل حته

-كنت دايما قبل ما اجى هنا بسمع كلمة الحياه هنا سهله بس مش بفهمها. الموضوع ان هنا لكل حاجه نظام لو عرفته هتمشى كل حاجه بسهوله جدا. العربيه رخصتها فى ربع ساعه والموظفه طلبت منى تقييم خدمتها ليا وانا خارج. لو اشتريت حاجه من النت ومعجبتكش عادى جدا انهم يرجعولك فلوسك وتحتفظ بالحاجه ويعتزرولك كمان
الفواتير الشهريه بتتخصم من الحساب اوتوماتك. ودى طبعا امثله بسيطه

- هنا مفيش حاجه اسمها تقعد فى البيت يوم الأجازه. انا كنت متعود يوم اجازتى راحه، لكن هنا الاجازه جناين وشواطئ وكامبات وشوى لحمه ولمه عائلات واصدقاء

-اللبنايين اللى هنا يمكن اكتر من اللى فى لبنان نفسها وليهم هنا صيت عالى والناس بتعملهم حساب جامد

- سيدنى فيها جنسيات لا حصر لها. صينيين وهنود وعرب ونيبال واتراك واوربيين كتير جدا وكلهم عايشين فى سلام غريب وكل جنسيه واخدين كام منطقه وعاملينها دوله لنفسهم لدرجة انك تلاقى المحلات فى الشوارع مكتوب عليها بلغة البلد ديه

- هنا مفيش طبقيه خالص يعنى الوزير زى الغفير كلهم بشر وليهم نفس الحقوق وعليهم نفس الواجبات ونظرة المجتمع ليهم زى بعض

- مستوى الدخل هنا متقارب جدا جدا لكل الوظايف. يعنى تلاقى الحد الادنى للأجور حوالى ٣٠٠٠ دولار فى الشهر وتاخد عليهم اعانه لو عندك اطفال وتدفع ضرايب ضعيفه. اما لو مرتبك عالى متاخدش اعانات وتدفع ضرايب كتير جدا وبالتالى معظم الناس دخلهم الصافى حوالى ٤٠٠٠ الى ٥٠٠٠ دولار دا طبعا لو الزوج فقط اللى بيشتغل ودا يكفى مصاريف البيت من اجار واكل وشرب وفسح وممكن لو كنت مدبر تحوش منه كمان

- معظم المدفوعات هنا بالأسبوع زى المرتب والايجار وخلافه

-الموظفين هنا يومهم بسنه وايقاع الحياه هادى جدالدرجة انك ممكن تبعت ايميل يردوا عليك بعد شهر عشان الناس مطمنيين ان لو حد ساب شغل هياخد اعانات وكده وبتلاقيهم بيغيروا وظائف كتير على عكس دوله زى امريكا مثلا بيشتغلوا زى النار عشان لو قعد فى البيت هيشحت

- البوسطه (البريد) هنا حاجه مهمه وبيجيلك جوابات مهمه جدا بأستمرار

- الاسعار هنا مختلفه خالص عن مصر يعنى مثلا انت ممكن تجيب علبة جبنه او بطيخه اغلى من كيلو لحمه والجمبرى ارخص من السمك البلطى والخضار اغلى من الفاكهه وحاجه اخر جنان

- العربيات هنا حاجه جميله جدا لما كنت فى مصر كانت عربيتى جزء مهم من ثروتى وبمبلغ وقدره وبخاف عليها زى عيالى ولكن هنا انا جبت عربيتى بألفين دولار وعربيه والله كويسه وطبعا الفين دولار بالنسبه للدخل مبلغ بسيط جدا. ولكن تصليح العربيه ممكن يتكلف اكتر من تمنها حرفيا عشان اجرة الميكانيكى عاليه جدا

- هنا اعلى دخول المهن اليدويه السباك والكهربائى والنجار وخلافه ودا بيخلى شباب كتير يخلص مدرسه ويعمل دبلومه كام شهر ويشتغل حاجه كده ويعيش برنس
انا حاولت فى البوست ده انقل صوره شامله للناس االى لسه مجتش عشان متتفاجئش وطبعا كل ده بناء عن تجارب شخصيه ليا ولأصدقائى ويعبر عن رأيي الشخصى فقط ولما افتكر حاجه تانى هبقى اازودها

-مناطق العرب والمسلمين على حد علمى هى بانكستاون جريناكر بنشبول ليفربول لاكمبا ياجوونا اوبرن. بانكستاون ٧٠% تقريبا لبنانيين وحوالى ٢٥% فيتناميين والباقى خليط. فى رأيي هى افضلهم عشان هى اقرب للسنتر من ليفربول وعشان جرينيكر مفيهاش محطة قطار ولاكيمبا مسلميين من كل البلاد وليس عرب فقط وبنشبول قديمه شويتين وياجونا كمان كويسه جدا وتعتبر امتداد لبانكستاون. اما اوبرن معرفش عنها كتير. مشكلة بانكستاون ان المدارس العامه المحيطه بها تلات مدارس منهم واحده على وصف الناس سيئه جدا وواحده معقوله وواحده كويسه جدا ودا طبعا عشان هى حى كبير وعلى حسب موقعك بها تتوزع على المدرسه
فيه منطقه اسمها رودس هى مش منطقة عرب لكنها قريبه بالعربيه منهم بتطل على بحيرات وعباره عن ابراج عاليه مش زى معظم سيدنى بيوت او دورين فقط مشكلتها انها غاليه سنه وغالبيتها صينيين

- نقطه كمان فكرنى بيها زميل فى كومنت وهى مواعيد المحلات. هنا البلد المحلات العاديه بتقفل حوالى الساعه خمسه المغرب ما عدا محلات الاكل والمحلات الكبيره زى kmart bigw target الغريب بقى ان يوم الحميس فى احياء العرب المحلات بتسهر والمول بيبقى زحمه جدا رغم ان الجمعه هنا شغل عادى بس معرفش الناس بقى عندهم يوم الخميس مقدس ولا هم حافظين مش فاهمين ولا ايه ?

-بالنسبه للعربيات فيه تلات انواع من التأمين: 
الاول اجبارى مع الترخيص ودا بيكون على الاشخاص لو حصل حوادث لا قدر الله
التانى تأمين على الغير ودا عشان لو واحد بعربيه رخيصه ومش محتاج يأمن عليها يروح يأمن لو عمل حادثه وخبط حد التأمين يصلح العربيه التانيه ودا معظم الناس بتعمله عشان التصليح غالى وبيخافوا يخبطوا عربيه غاليه
التالت انك تأمن على عربيتك نفسها
ترخيص العربيه اسمه ريجو ودا فيه من تلات و ست واتناشر شهر وطبعا كل حاجه اونلاين مفيش التعزيب اللى كنا بنشوفه فى مصر

- شبكات الموبايل هنا تلات شبكات رئيسيه اضعفهم فودافون ودى لا انصح بها تماما واقواهم تلسترا بس غاليه سنه والوسط اوبتس. المهم فيه شركات كتير موزعين للتلات شبكات افضل عرض لاقيته شركه اسمها دودو ٣٠ جيجا انترنت و٥٠٠ دقيقه مكالمات دولى غير طبعا مكالمات محليه مفتوحه ودا ب٢٠ دولار فى الشهر لمدة ست شهور وبعد كده اربعين دولار فى الشهر والانترنت مع نفس الشركه غير محدود بدون مصاريف تركيب ب٦٠ دولار فى الشهر

-عشان تعدى الشارع هنا طبعا لازم من مكان عبور المشاه والاشاره تكون سامحه. الجديد بقى انك ممكن تقف والاشاره ما تخضرش اصلا. لأنك فى زرار لازم تدوس عليه عشان السيستم يعرف ان فيه حد منتظر االعبوى

- قولنا ان حرارة الشمس حارقه بكل معنى الكلمه والتعرض الكتير للشمس بدون كريمات بيعرض الاوروبيين البيض الى سرطان الجلد. الجديد اللى عرفته انهارده ان واحد عايش هنا من تلاتين سنه هو اصلا ماليزى اضطر انه يرجع بلده سبع سنين عشان بنته تعبت من الشمس. قولتله ازاى مش دى حاجه مش بتأثر فينا احنا
قاللى ايوه لكن الجو فى ميلبورن واحيانا فى سيدنى بيكون جاف جدا بدون نسبة رطوبه وده بيسبب حكه شديده للأطفال والمرض ده اسمه athma

- انا جيت هنا فى الشتاء كان الجو اسقع من مصر شويه واحيانا مطر خفيف بعد الشتاء المفروض الصيف وهنا الغريب ان الصيف هنا او الوقت ده متقلب جدا جدا
يعنى مثلا انا كنت برا والشمس نار رجعت هموت من الفرهده استحميت ودخلت نمت ساعه وصحيت على صوت رعد رهيب ومطره وكور تلج بتخبط فى الازاز
كل ده ممكن اقبله لكن الاغرب انى لما فتحت الشباك الشمس ضربت فى وشى وحاسس بحرارتها الشديده فى نفس ذات الوقت مع امطار الثلج ?

-هنا الناس الكبار مهتمين بصحتهم جدا جدا لدرجة ان واحد صاحبى كان بيلعب كوره ولعب معاهم واحد معدى السبعين بهدلهم كلهم والحكومه بتساعد على كده لدرجة ان واحد معاه الجنسيه بيحكيلى ان لما عدى سن الخمسين بيبعتوله جوابات على البيت تحاليل يعملها دوريه ببلاش طبعا

- اللى هيجى هنا مش بس هيبتدى من الصفر تانى دا هيبتدى من تحت الصفر بعد ما كنت فى مكانه كبيره وبتقبض مرتب ضخم هيبقى اقصى طموحك انك تشتغل اى حاجه عشان تجيب مصاريفك زى اوبر او شغل المبانى او كاشيير او كول سنتر لحد ما تلاقى فرصة الشغل اللى قريبه من مجالك وبتكون عقد مؤقت فى الاول غالبا لحد ما تعمل الخبره المحليه او فيه ناس بتلاقيها فرصه انه يغير مجال شغله لحاجه تانيه خالص وبعدها الحياه تبتدى تستقر وتجنى سمار التعب والصبر

- بخصوص سيدنى وزحمتها:
فيه منطقتين فى سيدنى متركز فيها معظم الشغل والشركات الكبيره. 
الاولى الستى او السي بي دى ودى بتكون محطات القطر central w town hall w weinyard w redfern دول زى عندنا فى مصر كده رمسيس والسادات وجمال وعرابى. كل القطارات بتروح هناك وممكن تبدل هناك لأى مكان تانى. هناك هتحث انك سافرت بلد تانيه العمارات عاليه جدا على عكس معظم سيدنى والناس هناك علطول مستعجلين ولابسين فورمال وهتحس انك في وول استريت في نيويورك. اوعى تروح هناك بالعربيه ، الركنه شبه مستحيله ببلاش واللى بفلوس الساعه بسبعين دولار. اسهل وافضل طريق القطر
الثانيه براماتا ودى منطقه تجمع مال واعمال كبيره بس تختلف حبتين عن الستى ومعرفش عنها كتير بصراحه ومحطة القطر هناك اسمها برماتا

- المواصلات:
اولا بدون google maps هتتبهدل اخر بهدله. المواصلات فى سيدنى قطار واتوبيس. الاتنين هايلين وشبكتهم ممتازه بس طبعا القطار اسرع وافضل
الاتنين بتجيب كارت اسمه اوبال وتشحنه وتركب بيه وممكن تستخدم كارت البنك. الركوب بحوالى ٣ دولار ولو وقت الزروه خمسه ولو يوم الحد طول اليوم 8 ولو روحت مشوارين فى خلال ساعه بتتحاسب مره واحده وحوارات كتير زى مثلا ليك حد اقصى فى اليوم ١٦ دولار وفى الاسبوع رقم اعتقد ٦٠ وفى الشهر رقم تانى
عشان تركب اى مواصله من غير مرمطه هتفتح عمنا جوجل وتختار مشوارك وتبص القطر بتاعك هيجى الساعه كام على انهى رصيف
خد بالك ان على نفس الرصيف بيعدى قطارات كتير متركبش غير اللى ميعاده ظاهرلك

-هنا موضوع التعامل بالفلوس راحت عليه:
يعنى انت ممكن حرفيا تمشي من غير ولا مليم فى جيبك شهور. الدفع بيكون بكارت البنك عن طريق ملامسته فقط لمكنة الدفع او عن طريق تحويل الفلوس من الموبايل او عن طريق الموبايل نفسه تلمسه لمكنة الدفع. هتحتاج كاش ٢٠ دولار ولا حاجه احتياطى فى جيبك لأن احيانا نادرا حد يقول عايز كاش

-الشغل الكاجوال وانواعه:
اولا لازم تعرف ان هنا الشغل اى حاجه مش عيب خالص ولا نظرة المجتمع هتختلف بالنسبالك ولا المعامله سواء كنت عامل نظافه او رئيس شركه وبعدين هنا كل وظيفه كاجوال ليها عيوبها ودا سبب توافرها سواء كان مجهود بدنى او ضعف الدخل او شمولها لبعض الحاجات الثقيله على النفس. الشغل الكاجوال انت ملكش اى حقوق لا اجازات ولا اى امتيازات وشغال بالساعه وغالبا كاش

اولا ودا اشهرهم الكونفينينس او بياع فى سوبر ماركت صغير
ودا دخله بيكون حوالى ١٤ دولار للساعه بس مجهوده قليل وعدد ساعاته كتير ممكن ١٠ الى ١٢ ساعه فى اليوم ودا بيشمل كاشيير وترتيب المحل وكده ونظافته اخر اليوم. ودى عشان تشتغل بتنزل تدرب كام يوم وبعدين تبقى احتياطى شويه تنزل لما حد يغيب وبعد كده تاخد شيفت

ثانيا الكونستركشن او المبانى
ودا بيكون نجار مسلح او مبيض محاره او عامل تحميل وخلافه والدخل بتاعه عالي نسبيا حوالى ٤٠ دولار فى الساعه للمعلم او الخبره وحوالى ٢٠ للجديد فيما فوق على حسب الاقدميه والحرفه بس طبعا ديه شغلانه مجهودها البدنى رهيب خصوصا انك شغال طول اليوم فى شمس حارقه او مطر واحيانا المطر يوقف الشغل اصلا وطبعا غير مدفوع وبتصحى بدري جدا جدا

ثالثا السيكيوريتى او فرد الامن
ودا بيكون ليه رخصه بتعملها بعد كورس مدته اسبوعين تقريبا وشغله غلاسته فى مواعيده اللى غالبا بليل او فى الاجازات والدخل بتاعه بيختلف على حسب المكان والوقت وكده بس حوالى ٢٠ دولار فى الساعه

رابعا الديسابيلتى او المعاقين
هنا الحكومه بتوفر للمعاقين الخدمات اللى ميقدروش يعملوها زى مثلا توديه مشوار تنضفله البيت تظبطله الجنينه والحاجات ديه بس برده معرفش دخلها ايه نظامه

خامسا الهاندى مان او التكنيكال جاى
ودى بتكون انك مسؤول الصيانه فى منشئه زى مستشفى او دار مسنين وخلافه. يعنى بتاع كله تغير بطاريات سموك ديتكتور تغير اوكره تغير شباك تستلم الدليفرى كده يعنى، واى حاجه تحتاج عامل متخصص زى كهربائى او سباك تستدعيه وتتابع وتستلم منه. دخلها حوالى ٢٠ دولار فى الساعه ومشاكلها على حسب المكان احيانا شغل الحديقه يكون تبع الشغل واحيانا بعض شغل النظافه ودا بيختلف من منشأه للتانيه

سادسا اوبر ايت
ودا من افضل الحاجات مش محتاج عربيه حديثه ولا محتاج رخصه يكون مر عليها سنه والدخل بتاعه اسبوعيا ممكن يمشي بيت بس اوبر لكعيين شويه بتاخد حوالى شهر على ما تجيلك الموافقه

سابعا سواق تراك او عربيه نقل
ودا بيحتاج رخصه خاصه بحوالى الف دولار بس شغله مطلوب و الساعه بتاعته فوق ال٤٠ دولار

ثامنا الكول سنتر
ودا افضلهم من وجهة نظرى مكان مقفول وشغل مكتبى ودخل متوسط الساعه حوالى ٢٠ دولار

تاسعا تركيب شبكات ان بي ان اللى هى الانترنت فى البيوت الاوبتكال فايبرز
ودى بتحتاج عربيه نقل ومعدات بحوالى ١٠ الاف دولار وبتاخد كورس ١٥ يوم تقريبا على تعهد بأنك تستمر معاهم فتره ويقال ان الدخل بتاعها ممتاز ولكن للأسف المشروع خلاص قرب يخلص ومفيش تعيينات جديدة

عاشرا باريستا او جرسون
ودى بتكون دخلها على حسب المكان والاقدميه ممكن نقول متوسط ٢٠ دولار للساعه وطبعا بتشمل نظافة المكان وعمل القهوه وكده
دردشه حول الاستثمار فى استراليا

لما وصلت واكتشف ان معظم الوظائف دخلها متقارب جدا مع وجود السنتر لينك والضرائب ، فكرت فى الاستثمار بمبلغ بسيط وبما ان مجال خبرتى (الطيران) محتاج رأس مال كبير جدا ، زى اى مصرى اصيل اول حاجه فكرت فيها مشاريع الأكل ولكنى لقيت وجع دماغه كتير و مجهود ومخاطره ومنافسه شرسه جدا وكمان لو عملت اكل عربى هيبقى زبونك عربى فقط والجاليه مش كبيره لدرجة ان الموضوع يجيب عائد كبير، يعنى مش هيجيب همه

معظم المصريين هنا شغالين موظفين وعايزين يسيبوا الوظيفه ويعملوا بيزنس على عكس اللبنانيين اللى بالفعل معظمهم شغال حر

والدى ربنا يديله الصحه كان شغال فى دراسات جدوى المشروعات وكان دايما يقولى المشاريع اربع انواع تجارى وخدمى وزراعى وصناعى وترتيبهم من الاعلى للأقل فى المكسب هو الخدمى ثم التجارى ثم الصناعى ثم الزراعى. الكلام ده بالنسبه لمصر ، هل ينطبق على استراليا كمان ؟

فكرت فى مجال تانى ليا خبره كبيره فيه وهو البورصه ولكنه محتاج علاقات وثقه ودى حاجه لسه بعيده عليا شويه. فكرت فى انى اخد فرنشايز من اى شركه فى مجال يعجبنى لكنى لسه مش لاقى السكه وكمان الفرنشايز بيحتاج مبالغ كبيره فى الاول. فكرت فى مشروع حضانه لأن ده مجال تخصص زوجتى لكنها هتحتاج موافقات كتير وصداع بسبب التعامل مع الاطفال والتفتيشات وكده غير ان غالبا هتحتاج رأس مال كبير. فكرت فى فتح مركز تدريب صيانة طائرات لكنه مجال ضيق وزباينه معظمهم من الهند ومعرفش ايه نظام فيزا السياحه للهنود فى استراليا. الموضوع محتاج فكره بره الصندوق وغير تقليديه مع شويه اجتهاد

-تجربة السينما فى استراليا
طلع فى دماغى من كام يوم ادخل فيلم سينما واشوف الدنيا هنا مختلفه اذاى. دخلت سينما هويتس بانكستاون اللى قدام المول. اولا حجزت تذكره اونلاين بحوالى ١٣.٥ دولار بالضرايب. ثانيا لما روحت عند السينما عرفت انى وصلت من ريحة الفشار الرهيبه اللى فى الشارع. بعدها دخلت عايز اشوف هعمل ايه بالتذكره اللى اتبعتتلى على الايميل لكنى ملقتش اى موظفين غير بتاعة الفشار ومكنه اوتوماتك للحجز. 
روحت لبتاعة الفشار اقولها اعمل ايه ؟ 
قالتلى انت عايز فيلم ايه
قولتلها اكوا مان
قالتلى سينما ٥ فى الدور اللى فوق
طلعت لقيت بردوا مفيش اى موظفين
فتحت باب السينما ودخلت قبل الفيلم بنص ساعه وصلت لحد الشاشه مقابلتش مخلوق يقولى انت رايح فين ولا فين تذكرتك ولا الراجل بتاع الكشاف ولا كل سنه وانت طيب يا بيه. المهم نورت موبايلى ودخلت قعدت لقيت الفيلم اللى قبله لسه مخلصش. بس لقيت الكرسي جامد جدا بصراحه قولت استنى جوه اريح. كرسي جلد واسع بيتفرد وحاجه جميله خالص. المهم بعد الفيلم الاولانى النور ولع ودخل عامل نظافه ينظف. عشر دقايق سيبتله القاعه وخرج قال انا خلصت اتفضلوا. دخلت تانى ومفيش موظفين الاعلانات اشتغلت حوالى نص ساعه والنور والع والناس لسه بتدخل. اول ما الفيلم بدأ النور اتطفى والفيلم ساعتين ونص ومفيش حاجه اسمها استراحه فى النص. خرجت دخلت الحمام جري ورجعت والفيلم شغال. شاشة العرض تعتبر كويسه بس مكانتش سرى دى. المهم خلص الفيلم ولقيت الاسره اللى كانوا قاعدين جنبى للأسف راميين اشر اللب كله على الأرض ومنظر مخزى جدا للأسف لينا كعرب وخرجت وبردوا محدش قالى فين تذكرتك ولا انت فين ولا اى حاجه. وعلى فكره الفيلم حلو جدا جدا

- من كام شهر كان حد كتب بوست عن مخالفه عربيه خدها وبعت تظلم وشالوها عنه. الحقيقه انا احب اشكره انه عرفنى الطريق لأن انا حصل معايا نفس الكلام انهارده
من حوالى شهر جاتلى مخالفه على البيت غرامه ٤٥٠ دولار وخصم تلات نقط لكسر الأشاره ودخول اتجاه يمين والسهم احمر. ولأنى عارف نفسي ان معملش كده ابدا
كنت مستغرب وبقول ظلم والكلام اللى متعودين عليه ده. بس حد ربنا يكرمه قاللى انك تقدر تدخل على موقع المرور وتشوف المخالفه بتاعتك وانت متصور
المهم عملت كده فعلا ودخلت لقيت صورتين. فعلا السهم احمر وفعلا انا مشيت لكنى مدخلتش يمين انا مشيت علطول ولأن السنسور موجود على الحاره اللى فيها سهم الدخول يمين لقطتنى انى مشيت بس مفهمش انى كملت علطول. بالمناسبه انا غلطان انى مشيت علطول من حاره يمين فقط لكنى بعد استشارة استاذ محمد سيد معلم السواقه فى بانكستاون قاللى الغلطه ديه ملهاش مخالفه. المهم ركزت فى الصورتين لقيت دليل برائتى وهو انى كنت عامل اشاره انى داخل شمال مش يمين. بعتلهم تظلم وقولتلهم ان الشارع كان تلات حارات وفجأه الحاره اليمين اصبح عليها سهم يمين فقط ودا خلانى اكمل وادخل شمال لأن الطريق تكملته حارتين. المهم وبعد شهر جالى الرد انهارده بالأعتذار عن الخطأ والغاء المخالفه ورجوع النقط وانى مش مطالب بدفع حاجه. 

- خلاصة ما توصلتله في موضوع الشغل في استراليا
اول ما جيت هنا كنت جي بعقلية الموظف اللي جي بيدور على وظيفة في مجاله زي ما اتعودنا في بلادنا، وده كلام جميل طبعا. لكني اكتشفت ان استراليا مختلفة حبتين عن اللي نعرفة في الموضوع ده. بمعنى ان كل الناس دخلها من الوظيفة متقارب جدا بعد الأعانات الحكومية والضرايب. قولت لنفسي ان ربنا بيديلي فرصة جديدة اختار فيها كارير وانا ناضج واعرف اختار كويس بعيد عن نظرة المجتمع وفرق الماديات الكبير واني اشتغل الحاجة اللي بحبها عشان اكمل حياتي مرتاح. لكن بعدها غلب عليا التفكير بالمادة اولا. يعني مثلا لو اشتغلت في مجالي اللي هو هندسة صيانة الطائرات بكل الضغط العصبي الرهيب والمواعيد الغير منتظمة والمسؤلية الكبيرة، هلاقي نفسي باخد دخل زي موظف شغله اسهل من كدة بكتير
من ناحية تانية شغل العمال زي الكهربائي والسباك والمباني والحفر وخلافة دخله عالي جدا، لكنة طبعا مرهق جسديا جدا جدا ومع الكبر صعب اني استمر فيه مع تقدم السن
من ناحية تالتة استكمال الدراسات العليا والشغل في مجال الأبحاث كنت طول عمري بحلم بيه وكنت محروم منه في مصر، لكن لما قربت من الموضوع لاقيته مش بالسهولة اللي كنت متخيلها ومحتاج التزام بدخل ضعيف او بدون دخل لحد ما اخلص بعد سنين
رابعا البزنس الخاص دخله مالوش حدود فوق ولا تحت طبعا على حسب الرزق ولكن اهم حاجة دراسة السوق كويس وتعمل حاجة تكون بتحبها عشان تعرف تكمل فيها حياتك وكالعادة ابتديت افكر في الماديات اولا والمشاريع التقليدية زي مطعم وحضانة وشركة رش ولكني لاقيت ان معنديش خبرة في اي حاجة من دول والمنافسة عالية جدا والسؤال الأهم هل ديه حاجه انا بحبها وممكن انجح فيها!!
السؤال ده اجابتة تختلف من شخص لشخص على حسب خبرته و ميوله وقدراته المالية والذهنية والجسدية
الخلاصة انك هنا قدامك فرصة تبتدي على نضافة من جديد وتختار من تاني لنفسك عايز تكمل حياتك اذاي لأن وقت ثانوية عامه كان بعضنا اهله بيختاروله او على الأقل بيتأثر برغبتهم او بنظرة المجتمع او بالماديات لكن هنا كل شيئ متاح والأختيار متروك لك

- تجربة نقل سكن ممتازة
للأسف اتضريت اغير سكني عشان البيت اللي كنت فيه هيتباع وانا اصلا اليومين دول مشغول جدا وكل اصحابي وحبايبي هنا اتسحلوا معايا جامد اليويمين اللي فاتوا في نقل تبع الشغل عندي وبصراحة اتكسفت اعرفهم ميعاد نقلي عشان انا تقلت عليهم بما يكفي. ربنا يباركلي فيكم. المهم صديق عزيز اقترح عليا شركة نقل عفش صينيين وشكرلي فيهم جدا. كلمتهم وحضروا في ميعادهم بالظبط معاهم عربية كبيرة جدا واتنين رجالة فوق الستين تشوفهم تقول دول جايين يتشالوا مش يشيلوا
وكانت المفاجأة انهم جامدين جدا جدا. نقلوا كل حاجة من البيت القديق الى الجديد في تلات ساعات من غير ما اشيل انا قشاية حرفيا لدرجة ان الاتنين اصحابي اللي عرفوا صدفه وجم معايا كانوا مستغربين اذاي الموضوع سهل كدا. انا ديه تالت مره انقل في سيدني وكل مره كنت بأجر عربية ونتمرمط والعفش والبيت بيكون فيه خساير لكن دول ممتازيين جدا. دفعتلهم 300 دولار شامل البقشيش اللي هم طلبوه بنفسهم بس بصراحه يستاهلوا اكتر من كدة. دا انا كنت بأجر العربية بس ب150 دولار. اللينك بتاعهم تحت

https://newaussie.com.au/home-maintenance/removal/62-aaa-lucky-removal