تجربتي مع الهجرة (1)

حقيقي بقالي كذا يوم عمال أفكر هو أنا لو إتكلمت عن تجربة الهجرة بتاعتي ممكن أأقول إيه وأبدأ منين ..!!؟ وهل أبدأ بالمميزات ولا بالعيوب!!؟ وهل أنا فعلاً خلاص أأقدر أحكي على تجربتي ولا لسه شويه ..!؟

خليني في البوست ده أأقولك حاجة مهمة جداً - من وجهة نظري على الأقل -

1 - حاول تسمع من ناس وصلت حديثاً (شهور .. سنتين .. ثلاثة .. أربعة) زي ما بتسمع لناس بقالها هنا يجي 10 أو عشرين سنة ..

الناس اليوصلت حديثاً حيديك صورة عن الصعاب اليممكن تواجهها .. لكن الناس اليبقالها سنين هنا تقريباً بتكون نسيت كمية المرمطة اليمرت بها وبتحكي لك على نهاية الفيلم ..!

خلي بالك .. حديثاً دي مش مقصود بها شهور .. لأ .. خااااالص .. أنت ممكن تبقا بقالك هنا 3 سنين ولسه بتعافر .. بكرر لك الرقم ثاني .. 3 سنين ولسه بتعافر

2 - حاول تسمع من ناس كثير ..

لأن فيه مشكلة إن كل واحد عايش في المنطقة بتاعته (Comfort Zone) متخيل كل الناس عايشه فيها زيه ..! يعني مثلاً واحد يكون شغال في مكان والمكان ده فيه غرفه مخصصه للصلاة مثلاً .. فيقولك الحياة جميلة وبنصلى الفرض بفرضه هنا والحياة روعة ..! لكن مش بيقولك إن فيه ناس بتنزل تلف في الشوارع يمين وشمال علشان تلاقي محل بقاله بتاعة عرب وتدخل تصلي فيه ..! وفيه أوقات بيكون عندك إجتماعات مع عملاء وإلتزامات عمل ممكن تتسبب في إنك متصليش الجمعة أصلاً ..!

3 - أظن كلنا بنبقا جايين ومقتنعين إن لو العيوب أصبحت أكثر من المميزات أو إن الهجرة تسببت لك في تنازلات (دينيه بالأخص) فأنت حتاخد شنطتك وترجع .. للأسف الكلام ده ((بلح)) - على الأقل من وجهة نظري ..!

لأن التنازلات مش بتحصل مرة واحدة .. لأ .. بتحصل بالتدريج .. وأول مرة بتقول معلش حعملها كده بس مرة وبعد كده حتزبط ..!

زائد إن كل ما بتقعد في البلد هنا كثير بتلاقي نفسك بتتربط بها أكثر وأكثر .. وبالتالي قرار الخروج مش بيكون سهل خااااالص .. وممكن يكون في نفس درجة صعوبة (ويمكن أكثر) من قرار الدخول ..!

في النهاية محدش يفهم من كلامي إني بقولك الهجرة وحشه .. بالعكس .. الهجرة لها مميزات كثير .. كثير جداً كمان .. وكل يوم بيمر عليا هنا بكتشف ميزة أو مميزات جديدة في الهجرة .. بس أنا عارف إن ناس كثير بتقعد تحكي وتتحاكى عن المميزات فأنا بحاول أوريك الوجه الآخر من الصورة ..! لأن للأسف مش بشوف كثير بيتكلموا في العيوب .. يمكن علشان مش شايفينها .. أو مش عايزين يشوفوها .. مش عارف ..!

تحياتي وبالتوفيق للجميع

((رجاء :: أتمنى منكم الدعاء لي بظهر الغيب - مش في كومنت بالتوفيق وأن ييسر لي الله أموري لما هو خير لي في ديني ودنياي وأخرتي وعاجل أمري وآجله))

تجربتي مع الهجرة (2)

حتكلم معاكم المرة دي عن حاجة أظن أنها مهمة جداً إنك تكون محضر نفسك لها كويس من قبل ما تيجي .. مش قادر أحدد بصراحة إذا كانت عيب من عيوب الهجرة ولا مجرد ((تحدي)) .. أظن خلفيتك الدينيه والثقافيه هي ما ستحدد لك إذا ما كانت عيب أم أنها تحدي ..

النقطة التي أريدك أن تفكر فيها هي موضوع ((الإندماج في المجتمع)) .. حتعمل إيه بخصوص النقطة دي ..! وعلشان تفهم أنا بتكلم في إيه ححكي لك كام حكاية بسيطة كدا ..

أحد زملاء العمل في أول شركة إشتغلت فيها دعانا لعشاء في البيت عنده علشان يتعرف علي الناس الجديدة الينضمت للشركة .. الراجل كان محترم جداً وسئل كل واحد إيه الأكل والشرب المناسب لك .. المهم روحت العشاء ده عنده في البيت ومقعدتش أكثر من نص ساعة ومشيت .. وخلال النص ساعة دي تقريباً متكلمتش أكثر من خمس دقائق بس ..! وبقيت الوقت كنت شبه ((متنح)) ومش عارف أأقول إيه ولا أرد بإيه ..!

الحوارات كانت مزيج من أم زعلانه إن إبنها المراهق مش بيواعد بنات .. إسرائيلي لسه جاي من زيارة لإسرائيل وعمال يسخر من حماس .. زملاء بيتكلموا عن فيلم وممثل (Gay) ومش فاكرين إسمه وبيحاولوا يفتكروا إسمه وبيبصوا لبعض ويبصو لي علشان أحاول أفكرهم بإسمه ..!

قصة تانيه .. كان لي زميلة (أو زميل مش حتفرق - وحتفهم أأقصد إيه بعد شويه) .. الراجل ده أو الست دي في مرة كنا قاعدين فاضيين وعمالين نتكلم في مواضيع عامة وهوووب تحول الحوار والكلام على الفترة اليكانت قاعدة فيها في البيت من غير شغل وإزاي إنها كانت بتفكر تفتح بيتها كنادي للستات (lesbian) علشان يجو عندها ويقضوا وقت ظريف .. نسيت أأقولكم إن زميلتي دي هى في الأصل واحدة ست لكن كانت بتحضر لعملية إنها تقلب راجل .. وقلبت فعلاً بعد ما سيبت الشركة بشهر..

قصة أخرى عن مديرك المسلم البيشرب خمره على الصبح وبيعزمك في كافيه علشان تتناقشوا في شغل وتلاقيه بيطلب خمره ويقعد يشربها قدامك .. زميلك في السكن المسلم البيصلي بك إمام في صلاة المغرب في رمضان وبيصوم وتلاقيه آخر اليل جايب واحدة معاه ..!

ملخص الكلام .. أنت جاي هنا تعيش في المجتمع ده .. صح ؟ طيب إيه إستراتيجيتك للإندماج والتعايش مع المجتمع ده .. فيه ناس إختارت إنها تخلق لها مجتمع موازي وتعيش متقوقعه في المجتمع الموازي ده .. حقهم .. هما أحرار .. لكن فيه ناس تانيه مينفعش إنهم يعملوا كده لأسباب كثيرة .. أبسطها طبيعة عملهم .. فهل أنت عندك رؤية لكيفية التعامل مع مثل هذه التحديات ..!؟

تحياتي وبالتوفيق للجميع

((رجاء :: أتمنى منكم الدعاء لي بظهر الغيب - مش في كومنت بالتوفيق وأن ييسر لي الله أموري لما هو خير لي في ديني ودنياي وأخرتي وعاجل أمري وآجله))

تجربتي مع الهجرة (3)

في البوست ده تحديداً وفي البوستات التاليه ححاول أفصص أكثر الصورة التي حاولت نقلها لكم في البوست الأخير .. لأن من وجهة نظري الموضوع محتاج تفصيل أكثر وأكثر علشان أأقدر أوصل لكم ((فهمي)) للموضوع ..

من وجهة نظري (التي قد تحتمل الصواب أو الخطأ) فيه نقطة مهمة لازم تفرق بينها هنا في إستراليا فيما يخص الدين أو فكرة تقبل الآخر أو الإندماج عموماً .. لأن البعض بيخلط ما بين إنك عندك حرية عبادة وإنك تقدر تصلي في أي مكان وفي أي وقت .. وما بين ((كيفية تعاملك وتقبلك)) لشخصيات ونماذج حتلاقيها جنبك عادي جداً ((زي النماذج التي ذكرتها في البوست الأخير)) .. لازم نفرق ما بين النقطة دي .. والنقطة دي .. أه من حقك إنك تقول لمديرك عايز أروح أصلي .. ماشي .. لكن ده ملوش أي علاقه بإن زميلتك في الشغل إذ فجاءة بتكلمك عن نادي للسيدات (Lesbian) .. إمكانية الصلاة في أي مكان وأي وقت لم ولن تحل إشكالية العشاء الذي جمع بينك وبين شخص إسرائيلي وصل حديثاً من إسرائيل ويحدثك بسخرية عن حماس ..!

طيب .. لو إتفقنا على الجزئية دي .. يبقا ننتقل لنقطة تانية ..

هل أنا فعلاً عندي حرية كاملة فيما يخص معتقداتي وديني ..!؟ وخصوصاً لو معتقداتي دي فيها تماس إلى حد ما مع علاقاتي بالآخرين ؟ طيب لو فيها تماس .. المفروض أعمل إيه ؟ ومين يكسب ساعتها ..؟

وعلشان أوصل لكم عايز أأقول إيه .. خليني أحكي لكم حكاية صديق حصل معاه الموقف التالي..

الراجل كان شغال معايا في شركة كبيرة وكان جاي من الكويت على سيدني .. المهم هو راجل مش بيحب يسلم على الستات باليد .. مع العلم إن مجال شغلنا هو الإستشارات الفنية في مجال الحاسب الآلي وأمن المعلومات والمفترض إننا نروح نقابل عملاء من شركات كثيرة وكبيرة .. المهم زميلي ده مكملش 3 شهور مع الشركة وتم رفده ..! ولما إتصل بيا علشان يحكي لي قصة رفده بيقولي إن مديره قاله فيما معناه (إبقا دور على مكان شغل قريب من سكنك علشان يكون مناسب لعاداتك) ..!

طبعاً أنا قولت له إن الجمله دي كفيله إنها تودي مديره والشركة كلها في داهية وإنه ممكن يتهمهم بإنهم رفدوه لأسباب عنصريه .. لكن هو بدأ يحكي لي مواقف وضحت لي إنه شكله ((خبط)) في عملاء بسبب موضوع السلام باليد ده لدرجة إنه في أحد المرات مديره طلب منه ((يروح لعميله ويعتذر لها عن تصرف حصل منه)) ..!

خبر تاني من يومين نشرته الجرائد الأسترالية عن إن فيه سيدة مسلمه تم إتهامها بتهمة ((إهانة القضاء)) لأنها رفضت إنها تقف أو تكشف وجهها للقاضي .. !

بغض النظر إذا كنت تتفق أو تختلف مع القناعات الدينية دي .. بس هى قناعات دينيه بشكل أو بأخر وبالتالي نرجع تاني للسؤال الجوهري .. هل أنا فعلاً عندي حرية كاملة فيما يخص معتقداتي وديني ..!؟ وخصوصاً لو معتقداتي دي فيها تماس إلى حد ما مع علاقاتي بالآخرين ؟ طيب لو فيها تماس .. المفروض أعمل إيه ؟ ومين يكسب ساعتها ..؟

من وجهة نظري - جزئية أعمل إيه دي .. إحنا هنا كجالية عندنا فجوة كبيرة قوي فيها .. على حد علمي - وقد أكون مخطئ - مفيش ندوة تثقيفيه أو برامج توعية تساعدنا على إننا نعرف إزاي نتصرف بشكل حكيم في المواقف اليزي كده .. إزاي نتصرف بشكل يضمن تمسكنا بقيمنا وعادتنا الدينية وفي نفس الوقت نتصرف بشكل لبق محترم لا يتعارض مع قيم المجتمع العامة هنا ..

كل اليعرفني عن قرب يعرف إني أأؤمن بالعمل المؤسسي المنظم أكثر من المجهودات الفردية .. وحاجة زي اليبتكلم فيها دي - من وجهة نظري - مينفعش أأقولك إعمل كذا أو إتصرف بالطريقة الفلانية مع نفسي كده بناء على خبرتي الشخصية .. لأ .. لازم يكون فيه برنامج واضح علمي ومبني على تحليل لشخصية وقيم المجتمع الإسترالي وفي نفس الوقت مرتبط بعاداتنا وقيمنا الإسلامية بالأخص والشرقية عموماً .. وعلى حد علمي مفيش حاجة زي كده هنا لغاية دلوقتي ..! وتصرفتنا كلها من وجهة نظري (مجهودات فردية) ..! مرة ممكن تصيب ومرة ممكن تفرقع في وشك ..!

تحياتي وبالتوفيق للجميع

((رجاء :: أتمنى منكم الدعاء لي بظهر الغيب - مش في كومنت بالتوفيق وأن ييسر لي الله أموري لما هو خير لي في ديني ودنياي وأخرتي وعاجل أمري وآجله))

تجربتي مع الهجرة (4)

في هذا البوست سأنتقل معكم لمشهد آخر من المشاهد التي نقلتها لكم في البوست رقم 22 ..وهي إشكالية عدم وجود مواضيع حوراية مشتركة بينك وبين المحيطين بك ..!

في بداية وجودي هنا في إستراليا وفي إجتماعات كثيرة مع العملاء كنت أظل ((صامت)) ولا أتكلم وأرسم على وجهى إبتسامة ((بلهاء)) لأني ببساطة لم أكن أفهم عن ماذا يتحدثون ..! نكاتهم .. قفشاتهم .. مواضيعهم الحوارية .. ليست لها أي صلة بثقافتي ولا محصلتي الثقافية .. ولا حتى بمحصلتي الفكاهية ..!

تخيل شخص أجنبي يجلس وسط مجموعة من المصريين .. والمصريين يتبادلون الققشات والضحكات على جمل مثل ((ده جايلي أنا بقا)) .. أو ((ده أنا سلخت قبل ما أدبح)) ..! أو أنهم حينما يتكلمون يتبادلون الآراء في رواية أو فيلم عمارة يعقوبيان .. حاول تخيل هذا المشهد وستفهم ماذا أقصد..!

فجاءة ستجد نفسك تغوص في محيط أفكار .. ومواضيع .. .. لا تعلم عنها شيئاً ..!

ستجد أن هناك فجوة ثقافية (إن جاز التعبير) بينك وبين المحيطين بك .. فمحصلة قراءاتك لفهمي هويدي .. أو أنيس منصور .. أو نجيب محفوظ .. أو علاء الأسواني .. كلها ستساوي ((صفر)) بدون أدنى مبالغة في هذا العالم الجديد ..محصلة الأفكار والمعاني والقفشات التي تملئ وعيك ووجدانك من أفلام ومسلسلات ومواقف وكتب وحكايات ستجد فجاءة أنها ليست ذات جدوى في هذا العالم الجديد ..!

والإشكالية الأكبر- من وجهة نظري - أنك ستظل تعافر وتعافر إلى أن تعرف من أين تبدأ ..! لن تجد من يقول لك من هو أنيس منصور إستراليا لتبدأ تقرأ له وتبدأ في بناء محصلة ثقافية لها علاقة بالمجتمع الجديد الذي هاجرت له .. لن تجد من يقول لك من هو نجيب محفوظ إستراليا لتفهم طبيعة ثقافة هذا المجتمع الجديد الذي هاجرت له .. لن تجد من يقول لك ما إسم مسلسل ليالي الحلمية الإسترالي..! من هو عمرو أديب الإسترالي الذي يناقش قضايا وإشكاليات المجتمع الإسترالي ..!

ملخص الكلام في هذه الجزئية .. يجب أن تعلم أن من تكاليف الهجرة أنك تقريباً ستحاول بناء محصلتك الفكرية والثقافية من أول وجديد إذا كنت تريد ((بحق)) التأقلم مع المجتمع الجديد أو على الأقل ((تتفهم)) ماهيته ..!

تحياتي وبالتوفيق للجميع

((رجاء :: أتمنى منكم الدعاء لي بظهر الغيب - مش في كومنت بالتوفيق وأن ييسر لي الله أموري لما هو خير لي في ديني ودنياي وأخرتي وعاجل أمري وآجله))

تجربتي مع الهجرة (5)

إستكمالاً للمشهد الذي ذكرته في البوست رقم (2) عايز أأقولك إن المشهد ده فيه تفاصيل كثيرة يمكن مش حتفهمها بشكل حقيقي إلا لما تعيشها بجد .. لكن خليني قبل ما أأقولك أأقصد إيه خليني أفكرك إن البوست ده تحديداً يخصني أنا شخصياً .. يعني ممكن تكون المشكلة دي عندي أنا وأنت زي الفل ولا يخطر ببالك أي سؤال ولا أي حاجة من الحاجات اليحقولها في البوست ده تحديداً..!

أنا عايز أأقولك إن فيه خلخه حتحصلك .. أو على الأقل حصلت لي .. خلخله حتخليك أشبه بواحد دماغه خبطت في حيطة ودماغة عماله تررررن وتبدأ تدور في ذهنك أسئلة كتير من نوعية هو أنا مين!؟ .. هو أنا فين!؟ .. هو أنا هنا بعمل إيه بالزبط ..!؟ هو إيه الصح!؟ .. هو إيه الغلط ..!؟

يعني مثلاً .. فاكر الست اليقولت قصتها في البوست رقم 22 اليعملت عملية وحولت لراجل ..!؟ الست دي أو الراجل ده لما كنت بتكلم معاها كان عندها كمية إيمان ويقين بالله أشبه بالصوفيين ..! الست دي كانت بتعمل أعمال خيريه تطوعية تبع الكنيسة التي كانت تتبع لها .. الست دي كانت دائماً تذيل رسائلها بحكمة ((كلها يقين وتوكل على الله)) ..!

طيب فاكر زميلي في العمل الإسرائيلي .. لما حتيحي هنا حتعرف إن الإنجليز عملوا مذابح في سكان إستراليا الأصليين .. مذابح بالمعنى الحرفي للكلمة .. لكن من عشرات السنين بس بدأوا في الإعتذار لهم ومحاولة إعطائهم بعض حقوقهم .. وهنا حتسأل نفسك .. هو إيه فرق إستراليا عن فلسطين ..!؟ وليه قبلت أعيش في بلد إُغتصبت من أهلها وفُعلت المذابح في أهلها وعلى النقيض بكره إسرائيل وألعن سلسفيلها ..!؟ هل ستنتهي مشكلتنا مع إسرائيل لو أصبحت عادلة مع الفلسطينين ؟ هل مشكلتنا مع إسرائيل هي مشكلة عدالة أم قضية دينية ؟ طيب ما يمكن السكان الأصليين هنا الأرض بالنسبة لهم تمثل قيمة دينية كما تمثل فلسطين لنا كمسلمين ؟

إيه إحساسك وإيه مشاعرك وحتكون إيه أفكارك لما تروح مطعم في وسط البلد وبالصدفة تلاقي ((نتنياهو)) قاعد قدامك على الترابيزة في نفس المطعم ..!؟ .. المشهد ده مش تخيلي .. ده مشهد حصل فعلاً لأحد أصدقائي هنا في إستراليا ..!

صور المسلمين التي رسمتها لك في بوست رقم 22 لو فهمتها كويس حتلاحظ فيها إن فيه خليط جديد من المسلمين حتشوفه هنا .. خليط أشبه بألوان الطيف .. يعني بجانب التقسيمة التقليديه بتاعة وهابي أو سلفي أو صوفي .. حتلاقي هنا أشكال تانيه وألوان تانيه ..

المواضيع دي على قد ما هى بتخليك تشوف العالم بصورة أكبر وأوسع من الزاوية الضيقه اليكنت شايف العالم من خلالها زمان على قد ما بتطرح في ذهنك أسئلة بتخليك تلف حوالين نفسك ..!

أظن كده كفايه على الجزئية دي .. وإن شاء الله بداية من البوست القادم حبدأ أتكلم معاكم عن تجربتي بخصوص العمل هنا ..

تحياتي وبالتوفيق للجميع

رجاء .. متنسونيش بدعوة بظهر الغيب - مش في كومنت أن ييسر الله لي أمري .. فأنا في أشد الحاجة لدعوة بظهر الغيب ..

احييك على طريقة كتابتك لتجاربك ... التجارب دي ممكن تضمها وتعملها كتاب ...بجد احييك واتمنى تكمل كتابة عن تجاربك عشان نستفيد واقابلك ان شاء الله لو قدر الله واني سافرت استراليا