ان شاء الله البوست ده هيكون فيه مصلحه جامده قوي للناس ...مفيش احلي من ان يجيلك رزق من ربنا من غير ما تكون عامل حسابه :)

الموضوع و ما فيه ان معظم الناس اللي بتهاجر بيبقي معاها خبره لا تقل عن ٨ سنين فيما فوق...و معظمهم برده بيبقي شغال في شركات بتكون مأمنه عليه التأمين الحكومي...و ده معناه انهم بيقتطعوا من مرتبك كل شهر جزء (طبقا للمبلغ اللي الشركه مأمنه عليك بيه). فلو انت قدمت ورق يثبت انك خلاص هاجرت ...بتاخد الفلوس دي ...و طبعا ال package بتفرق من واحد للتاني حسب عدد سنين التأمينات و كمان حسب الشركه بتاعته كانت مأمنه عليه بكام...بس عامه هتنبسطوا :)

طب ايه الاوراق المطلوبه و اذاي ننجز في الحوار ده ...بصوا ...الموضوع ده في جزء واحد رخم بس ...ان انت لازم في جزء من الورق تعمله من استراليا ..فده معناه انك لازم تكون دخلت البلد ...بس لو انت عامل توكيل لحد في مصر ممكن يكملك باقي الورقيات و ياخد الشيك من التامينات. نبدأ بقي في الورق المطلوب و نبدأ بالجزء الاول " الورق المطلوب تخليصه من مصر" و ياريت تركزوا عشان تتفادوا تروحوا لكل مصلحه حكوميه اكتر من مره
١- محتاج انك تطبع الفيزا بتاعتك (الورقه اللي فيها الجدول بس) و تروح سفاره استراليا و تختمها و تاخد عليها تأشيره القنصل ...خلي بالك ان السفاره عندها ختمين ...واحد department of immigration و التاني embassy of Australia اتاكد ان هو ختم السفاره مش ختم اداره الهجره و لازم يكون القنصل مأشر عليه.
٢- تاخد الورقه دي و تروح توثقها من الخارجيه
٣- تاخد الورقه دي تاني برده و تترجمها في اي مكتب ترجمه معتمد من الخارجيه( مارينا ٢٠٠٠ شغال)
٤- تاخد استماره ٦ من اخر شغل ليك او صوره منها...بس لااازم تاخد ختم الشركه علي الاستماره ٦ مينفعش انها تتختم و بعدين تصورها...لا ...لازم تكون مختومه ختم حي.
٥-الخطوه دي هتسرع جدا في انك تاخد الشيك ...انك تجيب شهاده من مكتب التأمينات اللي انت تابع ليه بالمده التأمينيه بتاعتك ..و لو انت كنت في اكتر من شركه ...هات شهاده من كل مكتب تأميني تابع للشركات دي... الخطوه دي هتوفر عليك ان وزاره التامينات تقعد تخاطب كل مكتب تاميني انت كنت تابع ليه ...انت كده هتجيبلهم الورق لحد عندهم.
نيجي بقي للجزء التاني من الورق " الورق المطلوب تخليصه من استراليا":
هو انك تطلع بالباسبور بتاعك علي القنصليه المصريه و تخليهم يختموا "صوره طبق الاصل" علي كلا من صوره الباسبور بتاعك و صوره من الصفحه اللي في الباسبور اللي فيها ختم الدخول...و برده القنصل يأشر. و في الاخر تبعت الورق ده لمصر

كده يبقي انت جبت كل الورق المطلوب طريق التقديم كالاتي:
-تطلع علي مجمع التحرير...في مكتب مخصوص لشئون الهجره...هتديهم (استماره٦- ورقه الفيزا المتوثقه و المترجمه-صوره الباسبور و صوره ختم دخول استراليا) بعد كده تعدي عليهم كمان اسبوع تاخد شهاده اسمها "شهاده مهاجر".
-تطلع بشهاده المهاجر و جوابات المدد التامينيه بتاعتك علي وزاره التامينات الاجتماعيه اللي في وسط البلد و تقولهم انا عاوز اصرف فلوس التامينات...ان شاء الله كمان اسبوع و يدوك الشيك.
الموضوع مش صعب لو انت كنت مكمل ورقك كله و ان شاء الله مش هياخد وقت...علي الاقل الفلوس دي تجيبلك حق تذاكر الطيران ليك انت و العيله.
بالتوفيق و متنسوش نصيبي في الطلعه دي 

للأسف في مشكله في الجزء بتاع استراليا

مفيش ختم دخول, يبقي ايه العمل؟ :)

هو تعليقا على كلامك انا عندى مشكلتين :

1. انى اتفصلت من شركتى

2. مفيش ختم دخول على باسبورى