من خلال ملاحظتي الشخصية او اللي سمعته بوداني من recruiters واصحاب العمل، الناس هنا بتفكر بشكل منطقي انها بتفضل تعين حد ممكن تثق فيه. وعشان تثق فيه خصوصا لو مش من استراليا فلازم تشوفه بعينيها وتتأكد من ال cultural fit زي ما بتتأكد من وجود الخبرة العملية. ال cultural fit مش بالضرورة انك بتاكل وتشرب وتلبس زيهم، يكفي ببساطة انك تقدر تفهم اهتماماتهم وتقدر تاخد وتدي معاهم وتبني معاهم علاقة اقوى من مجرد شغل، سواء بقى بتحبو نفس فريق الكورة او نفس نوع الافلام او الكتب... الخ.

بشكل عام لما يلمسو فيك الجانب انك مرن و تقدر تتحاور معاهم وتعرف تقدم قيمة مضافة غير الشغل وتضيف لمستك الشخصية على ثقافة الشركة، دي بتديك رصيد هايل وبتقلل الصورة السلبية المسبقة اننا كعرب دماغنا قفل وناشفين.

من الادوات اللي تقدر تقابل بيها الناس وتعرفهم بنفسك هي العضوية في الاتحادات والنقابات المهنية وحضور اجتماعاتها ومؤتمراتها عشان تعرف الناس هنا بيتكلمو في ايه في المجال بتاعك. ومن خلال الحوار مع الناس حاول "تنصت باهتمام" لخبرتهم وشوف ايه الارضية المشتركة اللي ممكن تبني عليها محادثة وايه الحاجات اللي ممكن تتعلمها منهم او ايه المعلومة اللي ممكن تضيفهالهم. النوع ده من التواصل بيبني علاقة وثقة مع الناس مع الوقت وممكن تلاقيهم بيكلموك على فرصة شغل لو شايفين انك ممكن تفيدهم. بلاش تدخل دخلة "انا عايز اشتغل" عشان لاحظت انها بتقفل الناس، الدخلة الاظرف "I used to work in such industry overseas and I am currently exploring opportunities here". وممكن تاخد الكلام من النقطة دي وتحكي عن خبرتك.

حاجة كمان، حاول تعمل LinkedIn Premium وتتواصل عن طريقه مع الناس اللي بتقابلهم في المؤتمرات لإني لاحظت ان ثقافتهم هنا مبيحبوش يدوا نمرة تليفونهم لحد من اول مرة لغاية لما يثقو فيه. وخد بالك من الفرق بين انك بتفكر الناس بوجودك وبين انك تبقى "زنان". كل واحد طبعا وله طريقته في الحتة دي وممكن نخليلها بوست منفصل.

بشكل عام ملخص البوست هو انهم يشوفوك ويتكلمو معاك بدل ما اسمك يكون مجرد حبر على ورق السي في اللي غالبا عندهم منه كتير جدا.