السلام عليكم ورحمة الله وبركاته 

البوست المتين لعمل عمرة واللعب في البسين بتكلفة تخلينا نحط صباعنا في عين التخين وبالباسبور المصري الأخضر

طبعا بعتذر جدا عن تأخير البوست ده عشان كان المفروض أنزله من شهر ١ اللي فات بس ما بين مشغول و ما بين مكسل

بداية كده المعلومات دي من شهر ١١ و ١٢ ٢٠٢٣ و ١ ٢٠٢٤ يعني ممكن جزء منها ميكونش زي ما هو من ساعتها، مع نفسك بقى

بص يا سيدي

الموضوع باختصار إني من ساعة ما جيت أستراليا في ٢٠١٧ و أنا بنصح الناس كلها تنزل مصر عن طريق ماليزيا عشان أرخص، هم يسمعوا الكلام و يوفروا فلوسهم وأنا أعمل جمعيات وأصرف اللي ورايا واللي قدامي و أنزل مباشر

يقوم الطيران السعودي يعمل حركة جدعنة و يقول لك تعال اعمل عمرة عالسكة، أسكت؟ والله أبدا، قلت يلا بينا

بداية الأمر كبرت الفكرة في دماغ بعض الأصدقاء (حقول التجارب) و عملوها و اتبسطوا، فقلت يلا بينا بقى 

نفكنا بقى من الكلام اللي ملوش لزمة و ندخل في المفيد

أولا: حجز الطيران

أرخص حاجة من هنا لماليزيا (أو إندونيسيا للي حابب) هي AirAsia-X

ده طيران اقتصادي بس هيوصلك بالسلامة بإذن الله

بعد كده رحلة طيران سعودي من ماليزيا لمصر عن طريق جدة و تحجز من خلالها العمرة عن طريق stop-over visa

ايه اللي ناخد بالنا منه؟

١. وانت بتحجز الطيران السعودي، عشان أوبشن الفيزا يفتحلك محتاج يبقى الحجز قبل السفر بمدة ٣ شهور على الأكثر، يعني لو السفر أول ١٢ مينفعش تحجز قبل أول ٩

٢. لما تحجز طيران AirAsia بتنزل في ماليزيا في KLIA 2 و بتحتاج تنقل نفسك بشنطك بعيالك بسلطاتك بباباغنوجك لمطار KLIA و دول كده عاملين زي صالة ١ و ٢ في مطار القاهرة بس على أنضف..أوي

لما تحجز سيب لنفسك وقت ٤ ساعات عالأقل عشان تقدر تنقل بين المطارين لو معاك أطفال و ٣ لو لوحدك، بالنسبالي ٤ ساعات كانوا ممتازين بطفلين، نقلنا المطار و غيرنا و أخدنا دش و صلينا و أكلنا و دخلنا الطيارة اخر ناس عادي

بعض الأصدقاء تجنبوا الموضوع ده بأنهم حجزوا Malaysian Airlines من هنا و أثناء ال check-in في المطار ظبطوا مع الشركة انهم ينقلولهم الشنط عالطيارة التانية على طول عشان فيه code share بين الماليزية والسعودية

 أنا نزلت اتفسحت مع الأسرة ٥ أيام في ماليزيا وأنا رايح فالدنيا كانت تمام

٣. طيران AirAsia زي ما قلنا طيران اقتصادي، يعني لما بيطلعلك سعر الرحلة بتكون انه ينقلك بهدومك و شنطة ضهرك من نقطة أ لنقطة ب، لما بتحجز التذكرة بيظهرلك خيارات اضافية لحجز الشنط والكراسي وأكل لو عايز

شخصيا اشتريت package من عندهم كام فيها كرسي و شنطة ٢٠ كيلو و وجبة، كانت أرخص وقتها من إني أشتري وزن بس

ممكن برضه تشتري Fast Pass ب ٢٤ دولار تقريبا فيها مزايا كتير هتلاقيها موجودة على موقعهم بس أهمها شنطة ٧ كيلو زيادة و تسهيلات في الجوازات و شنطك توصل الأول و كده يعني، اشتريها لفرد واحد بس في الأسرة و خلي الشنط على تذكرته هو عشان توصل على طول

اعمل حسابك في مخدة رقبة ب ١٠ دولار من تارجت أو Kmart عشان تنام مرتاح لأن الرحلة ٧ أو ١٠ بالليل ف هتنام أغلب الطريق

لو العيال ناويين يسهروا خد معاك Zyrtec و ارتاح أو خد لهم موبايل أو تابلت يلعبوا عليه لحد ما يناموا

بعد توزيع الأكل في الطيارة هيبيعوا وجبات و بتدفع بالكارت عادي، هتكلم عن الكروت في نقطة تانية قدام

اه صحيح، و انت بختار الكرسي متختارش الكرسي اللي وراه حيطة ولا الكرسي اللي قدامه عشان مش هتعرف ترجع الكرسي لورا أو هتضايق اللي وراك و يمكن يطلب منك مترجعهوش، ف خليك فاكر اني قولتلك بلاش

٤. الطيران السعودي مع الفيزا بيديلك ليلة هدية في جدة أو الرياض حسب ترانزيتك فين، دي الليلة اللي هتوصل فيها بس، يعني مينفعش تطلب يخلوهالك اخر ليلة، ف بالنسبة لي كبرت دماغي ومحجزتهاش

٥. الطيران السعودي حلو و مريح جدا من ماليزيا لجدة والعكس، من جدة لمصر والعكس أتوبيس أرياف (و إن كنا بنظلم أتوبيس الأرياف كده)

بعد كده نتكلم في فسحة ماليزيا

وأنا رايح من هنا نزلت ٥ أيام في ماليزيا بعدين ٤ في السعودية

رحلة ماليزيا حلوة جدا و تقدر تظبطها كالآتي:

١. برنامج Klook ده شيء عظيم بشكر الدكتور مهندس الرفيق محمد ناجي انه عرفني عليه، ده برنامج بتنزله و تحجز من عليه رحلات حلوة أو حتى تشوف ايه الأماكن السياحية الحلوة و تروحها مع نفسك أو ساعات تحجزها أرخص من مواقع تانية

٢. برنامج SoCar للي يحب يسوق في ماليزيا، بس اللي مساقش هناك قبل كده بلاش

أنا عشت هناك ٧ سنين قبل كده و مع ذلك كرهت نفسي في يومين سواقة، المواصلات العامة هناك حلوة جدا و برنامج inDrive ممتاز و بينجز

لو هتركب تاكسي شوف سعر inDrive كام و اتفق الأول قبل ما تركب

نصيحة للي عايز يسوق هناك يطلع رخصة دولية من هنا ب ٤٩ دولار وانت واقف و معاك ٤ صور في Service NSW و يريح دماغه

٣. الأماكن السياحية المشهورة هناك هي:

KLCC and Twin Towers

Petrosains

ده حاجة عظيمة جدا جوه ال Twin Towers الأطفال والكبار هيستمتعوا بيها جدا

Bukit Bintang aka شارع العرب

KL Tower (Menara KL)

360 Revolution Restaurant 

Pavilion mall

Berjaya Times Square 

و دي فيها تسوق بأسعار معقولة و فيها theme park حلوة

China Town 

و دي تفاصل فيها كأنك بتشتري من العتبة، اللي يقول لك ب ١٠ قول له ٣ و خلص معاه على ٤ و انت كده خسران كمان

بره كوالالمبور لو وقتك يسمح عندك:

Genting Highlands

دي مدينة ملاهي فوق الجبال بتركبلها تليفريك حلوة جدا

Cameron Highlands

و دي مزارع شاي وفراولة حلوة برضه

Legoland 

بس بعيدة شوية قرب حدود سنغافورة في الجنوب بس حسب سن أولادك ممكن تروحها، و عن طريق Klook ممكن تحجز باص فاخر بيطلع من كوالالمبور الصبح و بيطلع من ليجولاند اخر اليوم

LEGOLAND Malaysia https://g.co/kgs/s7nCuYi

دي كده أشهر المعالم غير المساجد الرائعة اللي هناك 

و زي ما قلت، Klook يجيبلك المختصر المفيد

تنويه: متروحوش معابد وثنية عشان هي مش ناقصة يعني

٤. هات الإحرام من ماليزيا من المحلات اللي في Jalan Masjid India

قول لهم مش عايز عليه الشعار الأخضر بتاع ماليزيا هيفتحولك احرامين و يدولك القطعة البيضا بس و بسعر احرام واحد، و اشتري حزام جلد أبيض و شبشب للاحرام برضه من هناك او من ChinaTown أو خد معاك من هنا أفضل لو لقيت مقاسك عشان مقاساتهم هناك آخرها ٤٤ لفيت يوم كامل عشان ألاقي ٤٥

٥. صحيح كنت هنسى السكن

ظبط حاجة AirBnb حلوة أو احجز فندق لو بترتاح أكتر في الفنادق، المهم يكون المكان قريب من المواصلات

٦. الأكل الماليزي مختلف عن أكلنا طبعا بس حلو جدا، و في نفس الوقت كوالالمبور وبالذات Bukit Bintang مفيهاش أكتر من المحلات السوري والعربي ف مفيش قلق يعني بس جودتها أقل من المحلات العربي اللي هنا شوية

٧. قبل ما تمشي من الفندق أو البيت اغتسل للإحرام (مش من واجبات الإحرام لكن مستحب) و خد بالك متحطش برفان ولا مزيل عرق فيه ريحة، هات حاجة طبية بدون ريحة عشان العرق

في المطار قبل ما تدخل الطيارة على طول ادخل على أي حمام هتلاقي أماكن تغير فيها احرامك

في الطيارة برضه ممكن تغير والحمامات واسعة و حلوة في الطيارة بس اختار الحمام اللي في النص مش اللي عالأجناب عشان بيكون أوسع. نصيحة لو معاك أطفال غير لهم في الطيارة أحسن عشان ميتعبوش من الإحرام طول الرحلة.

الطيران السعودي فيه ساعة في الشاشات لمكان الميقات، و بيعلنوا عنه كذا مرة فبالتالي الدنيا حلوة لا تقلق انك هتفوت الميعاد، لو خايف ممكن تسأل شيخ إذا كان ينفع تقول النية اللفظية للإحرام قبل الميقات ولا لأ عشان معرفش ومسألتش

٨. الانتقالات من وإلى المطار:

عندك كذا طريقة

KLIA Ekspress (train)

Bus

Taxi

Car rental

شوف الأنسب لك و لشنطك و روح بيه، شخصيا أنصح بالقطار عشان سريع ومريح جدا، و من جوه Kuala Lumpur اركب inDrive روح بيه فندقك أسهل

٩. خط التليفون:

هتلاقي في المطار عروض حلوة و كتير و سعرها زي بره المطار، اشتري eSim و ريح نفسك عشان متفكش و تركب خطوط في المطار

تعقيب ١:

ماليزيا هتديلك فيزا ٩٠ يوم عند الوصول بالباسبور الأخضر (شوف الدنيا يا أخي)

تعقيب ٢:

من الأماكن السياحية الجميلة برة كوالالمبور برضه مدينة Langkawi، مدينة Penang و فيه جزيرة رائعة في نص البحر في الساحل الشرقي لماليزيا اسمها Perhentian Islands دي في ولاية Terrenganu مواصلاتها تقريبا ٨ ساعات من كوالالمبور بس بيقفلوها بين شهر ١٠ و شهر ٣ كل سنة عشان ال monsoon (مطر شديد و مد وجزر عالي)

جزء Sabah and Sarawak ده جزء تاني من ماليزيا ملاصق لحدود إندونيسيا 

الفكرة بس ان الأماكن دي بعيدة شوية لو حد ناوي ينزل ماليزيا ٣-٥ أيام 

لو فترة أطول اه طبعا دي أماكن ممتازة ❤️

تعقيب ٣:

اتضح ان AirBnb ضمن المقاطعة، و أعتقد كان فيه كلام على Booking كمان

يبقى الأفضل الحجز في فندق من موقع الفندق مباشرة بعد التأكد ان الفندق (أو مجموعة الفنادق) خارج المقاطعة برضه

نروح نعمل عمرتنا بقى ولا ايه؟

أفضل شيء أنصح بيه إنك تروح في وسط الأسبوع بعيد عن الويكند، يعني روح من التلات للجمعة مثلا لو حابب تصلي الجمعة في الحرم، أفضل وقت من الأحد للأربعاء عشان تتجنب الزحمة بس برضه هيكون زحمة

١. حجزت الفنادق من هنا عن طريق Agoda عشان لقيته أرخص من Booking بكتير و عليه خيارات مش موجودة على Booking و ممكن برضه تشوف trivago أو google hotels

في نقطة بسيطة بس في حجز الفنادق لما تحجز مع مسوقين افضل بكثير في السعر يعني مثلا الفندق علي بوكنج كان ب ٢٠٠ ريال الليلة و من الفندق نفسه ٢٥٠ ريال الليلة و انا حجزت نفس الفندق ب ٨٠ ريال الليلة. 

فيه ناس بتبقي حاجز نص الفندق مثلا طول السنة فا الفندق بيديهم سعر كويس علشان حاجزين سنوي فا هما بيديهم بسعر قليل فا هما بقي بيبيعوهم بسعر قليل برده بس فيه مكسب للطرفين (المعتمرين و المسوقين). طيب توصلهم ازاي ؟ خش علي الفيس بوك و اكتب حجوزات مكة و المدينة هتلاقي صفحات و جروبات كتير جدااااا و شوف اللي ترتاحله و احجز معاه. و اكد معاه يبقي دفع عند الوصول علشان النصب طبعا.

أهم حاجة في الحجز اعمل street view و شوف هتوصل للحرم ازاي عشان اللي حجزته كان على جبل بس حرفيا ٥ دقايق من الحرم و كان فيه عربيات جولف بتاخدك من فوق الجبل لتحت والعكس ف دي كانت حاجة حلوة، بس أعتقد حتى الفنادق البعيدة عن الحرم فيها اتوبيسات مجانية كل ساعة تقريبا

في الحجز برضه خلي بالك عشان مش كل حاجة فيها free cancellation or change و ممكن لو غيرت خطتك تضيع عليك فلوس الحجز ف خد بالك

٢. برامج مفيدة جدا:

أ. للمناسك:

Al-Nusuk Guide

https://play.google.com/store/apps/details?id=org.riotulab.alnusuk_guide

مناسك العمرة

https://play.google.com/store/apps/details?id=com.mohamed83.omra

المطوف 

https://play.google.com/store/apps/details?id=com.madar

ب. للخدمات وحجز بعض المناسك:

Nusuk

https://play.google.com/store/apps/details?id=com.sejel.eatamrna

Tawakkalna

https://play.google.com/store/apps/details?id=sa.gov.nic.twkhayat

ج. لحجز قطار الحرمين:

https://play.google.com/store/apps/details?id=com.indra.haramain.pro

٣. قطار الحرمين:

حجز القطار في الويكإند غالي جدا جدا جدا (كان تقريبا ١٦٠٠ ريال رايح جاي لأسرة ٤ أفراد بدل ٤٠٠-٦٠٠ ريال مثلا في وسط الأسبوع)، لو عايز تستخدمه في وسط الأسبوع الأسعار جميلة 

مشكلته التانية في حجم الشنط، نقطة الانتقالات تحت هقول لك فيها تعمل ايه

٤. العمرة:

لو معاك عربية أطفال زي اللي هتكلم عنها تحت هتزعلك في الطواف.

الصحن تحت و مطاف الدور الأول ممنوع دخوله الا بالإحرام

لو معاك عربية أطفال أو كرسي بعجل مينفعش تدخل الصحن و هيطلعوك فوق، الشوط الواحد من فوق ب ٧ من اللي تحت، خلصنا الطواف يوم ما وصلنا من بعد صلاة العصر لحد صلاة المغرب عشان طفنا من فوق، بعدين رحنا للسعي.

أنصح انك تسيب العربية في الفندق و تروح كده عشان تعرف تدخل الصحن تحت.

أنصح برضه بمتابعة قناة مكة المكرمة عالتلفزيون أو YouTube عشان تشوف الحرم فاضي امتى و تروح. 

نصيحتي برضه حاول تخلي رحلة العمرة دي في نص الأسبوع يعني أبدأ يوم الحد أو الاتنين.

٥. الأطفال:

لو عايز تعمل عمرة بدون أطفال، فيه حضانة في الدور الأول في برج الساعة ورا ستارباكس ال ٨ ساعات كانت ب ١٧٠ ريال تقريبا، يعني طفلين كانوا تقريبا ب ١٥٠ دولار أسترالي بس استمتعنا بالعمرة التانية.

الأطفال متعبين شوية في الحرم، مفيش حمامات جوه ف لو طفل عايز حمام هتضطر تمشي ربع ساعة مثلا عشان تنزل من الدور التاني أو السطح و تروح الحمام و زيهم عشان ترجع. لو معاك أطفال في سن تدريب الحمام ممكن تقعد في الساحة برة مثلا أو تلبسهم Nappy pants وقت ما تحب تروح الحرم

٦. المدينة:

للأسف مقدرتش أروح المرة دي عشان لقيت القطار غالي جدا في الويكند ومعرفتش أحجز مكان في زيارة الروضة لزوجتي.

من برنامج نسك (أو توكلنا مش متأكد) بتحجز زيارات الروضة.

لو ملقيتش حجز، ادخل تاني على رأس كل ساعة بيتعمل refresh و بتظهر أماكن جديدة.

لو هتروح المدينة احجز الفندق والروضة من بدري.

نصيحة تانية كنت مخطط أعملها: بدل البهدلة بالشنط لو أسرة، احجز الفندق في مكة ال ٤ ليالي، و في المدينة ليلة واحدة في النص، سيب شنطك في مكة و خد شنطة ضهر بس للمدينة و ادعيلي

لو لوحدك بدون أسرة اعمل اللي انت عايزه، و ادعيلي برضه مش هسيبك

٧. الانتقالات من وإلى المطار:

في مطار جدة عربيات كتير جدا هتلاقيهم واقفين يتخانقوا عليك أصلا 

خد العربية ب ١٥٠-٢٠٠ ريال و اتأكد من الفندق اللي انت رايحه عشان السواق اللي أخدني كان هينزلني على حدود مكة تقريبا عشان أسامي الفنادق كلها شبه بعض وهو حب يستسهل

لو حابب، الرفيق محمد ناجي برضه كان بعتلي رقم رجل محترم جدا لأبعد مدى معاه عربية GMC كبيرة أخد ١٧٠ ريال من الفندق في مكة لمطار جدة

لو عايز رقمه كلمني

مجربتش الطرق من مكة للمدينة بس أعتقد سهل تتظبط مع البيلمان اللي في الفنادق لو عايزين تاكسي أو كده لمحطة القطر أو حتى للمطار

٨. خطوط التليفون:

لو معاك ال International eSim اللي هتكلم عنها تحت ف انت زي الفل، اشتري خط من مكة هتلاقيهم واقفين بيبيعوا خطوط رخيصة جدا حوالين الحرم في الشارع

لو اتزنقت زي حالاتي أشتري خط واحد بس من المطار عشان الباقات بتاعتهم غالية جدا (ضعف اللي في مكة) و هات لباقي الأسرة من مكة

٩. الحلاقة:

اوعى تسمع كلام حد يقول لك تعال احلق و يمشيك وراه، انا لفيت ورا واحد تلت ساعة في العمرة التانية دخلني في متاهات في مول أبراج مكة و في الآخر عايزين ٢٠ ريال. الحلاقة ب ١٠ ريال في كل حتة. شوف أقرب حلاق للفندق عندك و اتفق عالسعر قبل ما تحلق. اتأكد انه بيستخدم موس جديد و انه بيرميه بعد ما يخلص.

أغلبهم بيحطوا مياه عالراس ويشتغلوا على طول، لو بشرتك حساسة خد معاك كريم أو مرطب لبعد الحلاقة

١٠. العمرة التانية:

اسأل على عربيات التنعيم من نواحي فندق التوحيد كده، هتعدي كوبري صغير كده مشي هتلاقي العربيات بتحمل من اخر الكوبري

الفرد ب ١٠-١٥ ريال رايح جاي

بتروح هناك تصلي ركعتين و تنوي الإحرام و ترجع تاني

كنت فاكر ان لازم أستنى ٣ أيام قبل ما أعمل عمرة تانية، سألت الشيخ محمود الأزهري ربنا يبارك له قال لي مفيش الكلام ده، يعني لو عايز تعمل عمرة تانية بعد الأولي على طول توكل على الله

١١. الغسيل والكوي:

نصيحة، أشتري من هنا مكواة travel steam iron عشان تريحك في الكوي عموما

و لو حابب تشتري غسالة compact collapsible هتلاقيها موجودة على AliExpress و Temu وأشباههم بالهبل

الغسيل والمكواة في مكة غالية جدا جدا (هتقول لي وأنا أغسل ليه، هقول لك لو عايز عمرة تانية هتضطر تغسل الإحرام عشان هيكون زعل منك بعد رحلة الطيران والعمرة الأولى يا عسل)

١٢. التسوق:

هتلاقي محلات بن داوود أشتري من عندهم أكلك وشربك للفطار والعشاء و كده لو الفندق مكانش half or full board

خد بالك لو هتتسوق عشان النصب كتير في كل حتة، الحاجات اللي هناك موجودة برضه في مصر فمتتعبش نفسك انك تجيب هدايا من هناك ممكن تجيبها ب نص تمنها في مصر

١٣. مياه زمزم من المطار:

في المطار الراجل بتاع مياة زمزم هيقول لك لو معكش فيزا عمرة مش هتطلع بيها الطيارة

أنا أخدت الrisk و توكلت على الله، وقعت في موظف الطسران مكنش فاهم الكمبيوتر بيشتغلوا بيه ازاي و عدت الحمدلله

وصلت القاهرة لقيت ٢ من أصل ٤ علب وصلوا على السير بتاع الشنط. خدها من قصيرها و روح على مكتب مفقودات الطيران السعودي قول لهم ناقصك كام واحدة هيدولك بدل اللي مش لاقيهم، هم عارفين المشكلة و عاملين حسابهم

أم الدنيا بقى ولا ايه؟ ايه 

١. اهرب لو ملكش حد عزيز في مصر و نازل تتفسح ف أحب أقول لك عادي، اتفسح و هيص، بفلوسك بس خد بالك عشان النصب والفهلوة بقت حاجة عادية جدا وناس كتير شايفة إن من حقها انها تنصب عليك عشان انت غني و بتقلض بالدولار (مش عارفين اللي فيها)

٢. متتصدمش، و اتعود على قطع الكهربا عادي، رتب مواعيدك على كده بس

٣. لو هتخلص أي ورق حكومي شوف لو تخلي حد يخلصهولك بالفلوس و ريح دماغك

نقاط عامة:

١. كارت HSBC Everyday Global

ده كارت طلعه تسحب بيه من بره أستراليا بنفس سعر البنك تقريبا و بدون عمولة و تدفع بيه في كل حتة عادي

نفعني جدا في السعودية و ماليزيا بس مصر طبعا مطلعتهوش عشان وقتها كان فيه سوق موازي سعر الدولار الحقيقي فيه أكتر من ضعف سعر البنك

لو ملحقتش تعمله، قدم على travel money card من البنك بتاعك مش بياخد عمولة بس سعر الصرف أقل شوية من البنك في العادي

٢. معاك أطفال تحت ٣ سنين؟ تعال أقول لك حاجة

أشتري من هنا travel pram مستعمل من عالفيسبوك

أفضل نوع اسمه gb pockit

حتى لو اشتريت الstroller اللي ب ٣٠ دولار من تارجت أو Kmart هتفيدك برضه

اتأكد بس انك تاخد عليها sticker و انت في الcheck in في المطارات عشان ينزلوهالك بطن الطيارة لو مفيش مكان فوق

٣. ال International eSim

نزل برنامج اسمه AirAlo و اعمل International eSim تدخل بيها عالنت و فيه باقات للمكالمات كمان، دي مفيدة جدا في المطارات و ماليزيا والسعودية وحتى مصر لحد ما تجيب خطوط محلية

ممكن تنزل الموبايل على تليفونك بعدين تبعد كود الاشتراك لزوجتك و تاخد الكود بتاعها كل واحد فيكم ياخد كريديت بعدين تشتروا الباقة

اللي يروح يدعيلي ولأهلي 

 البوست بالكومنتات موجودة على جروب Land Down Under عالفيسبوك:

بوست ١:

https://www.facebook.com/share/p/qHVeFvtSXjbD7MV8/?mibextid=oFDknk

بوست ٢:

https://www.facebook.com/share/p/CJYkps8kJeF1mvgC/?mibextid=oFDknk

بوست ٣:

https://www.facebook.com/share/p/baHjrCke2AwLE2CB/?mibextid=oFDk