بسم الله الرحمن الرحيم .. انا هاتكلم عن الخطوات اللي تعملها علشان تقدر تشتغل في مجال السيكيوريتي وايه هي طبيعة الشغل ده اصلا وده بالنسبه لسيدني 

 اولا علشان تشتغل في المجال ده لازم يبقى معاك رخصة من البوليس وعلشان تطلع الرخصه لازم تاخد كورس سيكيوريتي وكورس اسعافات أوليه من مركز معتمد من شرطة سيدني .. فيه قايمه على موقع شرطة سيدني عليها المراكز المعتمده كلها .. الأسعار قريبه من بعض فممكن تاخد اي مركز يكون قريب منك .. الكورس مدته أسبوعين و بحوالي ٥٥٠ او ٦٠٠ دولار

اسم الكورس Certificat II in Security Operations

الكورس ده بيخليك تقدر تطلع رخصة انك تشتغل سيكوريتي جارد او في مركز تحكم .. في كورسات تاني بتتاخد مدتها يوم ولكن لا انصح بها لانها ليها علاقة بالكحوليات والقمار ..والأماكن ديه طبعا حرام ده غير ان مشاكلها كتير جدا

الكورس رخم شويه لانه هما مطالبين بعدد ساعات محدده وبيجي تفتيش على المراكز من البوليس فلازم تقضي فترة الكورس كله من غير غياب ولا يوم .. وبيبقى ١١ ساعه في اليوم .. الكورس اهم حاجه فيه الحضور .. انما مفيهوش سقوط ونجاح .. امتحان خفيف في الاخر كله بينجح فيه .. الكورس ممل شويه بس فيه معلومات مهمه عن البلد وقوانينها 

بعد ما بتخلص الكورس بتملى طلب بتنزله من موقع شرطة سيدني وبتملاها وتبعت الطلب مع نسخ طبق الاصل مختومه من شهادة الكورس وشهادة الاسعافات الاوليه وبتختم الصور من 

Justice of peace 

 بيبقى موجود في المكتبات 

الرخصه تكلفتها ٦٤٠دولار لو لمدة خمس سنين و ١٦٠ دولار لو لمدة سنة

كل المراسلات مع الشرطة عن طريق البريد .. فالموضوع بيطول شويه .. بعد ما تبعت الطلب والشعادات هايردوا عليك بعدها باسبوع او ١٠ ايام يقولولك تعالى علشان ناخد بصمة ايدك .. بتروح مركز الشرطة تبصم وبياخدوا حوالي شهر بعدها على ما يعملوا تحقيق من البصمه .. بعدها يبعتولك جواب تاخده وتروح على 

NSW service centre 

تتصور ويبعتولك الرخصه بعدها ب ٤ ايام 

مبروك بقى معاك الرخصة :) .. نيجي بقى لطبيعة الشغل .. شغل السيكيوريتي متوفر جدا بس عيبه انه مرهق جدااا لانك هاتقف فترات طويله وهاتمشي كتير وكله بيعتمد على طبيعة المكان اللي هاتشتغل فيه سواء مول او بنك او مكان عام .. بالنسبه للمرتب اقل مرتب هاتتحاسب عليه هو ٢٠.٤ دولار في الساعه قبل الضرايب .. ويوم السبت بيتحسب بيوم ونص .. ويوم الاحد بيتحسب الضعف هو والاجازات الرسميه .. وشيفتات بالليل بتبقى اغلى شويه .. ممكن تشتغل كاجوال وممكن تشتغل وظيفه دايمه .. الكاجوال الساعه بتاعته اغلى بس مش دايما متوفر

بالتوفيق للجميع ان شاء الله :)

For more information about other jobs, which you can get relatively easy, check the following question.
http://newaussie.com.au/index.php/43-easy-to-get-jobs

In NSW, you can apply for the licence as soon as you start living in NSW (and finish the course requirements). 

In VIC, you need to be living in the state for a year before you can apply for a licence.